Sekretari i Mbrojtjes i Shteteve të Bashkuara të Amerikës, Pete Hegseth, foli për sulmet amerikano-izraelite në Teheran dhe në të gjithë Iranin, dhe i quajti të gjitha operacionet ajrore më komplekse dhe precize në histori.
Siç u përmend më parë, Pentagoni e quajti këtë operacion “Tërbim Epik” dhe Hegseth tha se Teheranit iu dha mundësi e mjaftueshme për të bërë një marrëveshje.
“Regjimi iranian pati shansin e tij, por refuzoi të bënte një marrëveshje – dhe tani po vuan pasojat. Për gati pesëdhjetë vjet, Irani ka synuar dhe vrarë amerikanë, duke kërkuar gjithmonë armët më të fuqishme në botë për të çuar më tej kauzën e tij radikale. Mbrëmë, ndryshe nga çdo president i mëparshëm, Presidenti Trump filloi të luftonte këtë kancer”, tha Hegseth.
Ai tha gjithashtu se nuk do të tolerojë raketa që, sipas tij, synojnë popullin amerikan.
“Ato raketa do të shkatërrohen, së bashku me prodhimin e raketave të Iranit. Marina iraniane do të shkatërrohet. Dhe, siç e ka thënë Presidenti Trump gjatë gjithë jetës së tij, Irani nuk do të ketë kurrë një armë bërthamore. Shtetet e Bashkuara nuk e filluan këtë konflikt, por ne do ta përfundojmë atë. Nëse vrisni ose kërcënoni amerikanët kudo në botë – siç bëri Irani – atëherë ne do t’ju ndjekim dhe do t’ju vrasim. Luftëtarët tanë janë më të mirët në botë dhe ata janë plotësisht të lirë të arrijnë objektivat tona. Providenca e Zotit i mbrojttë ata në këtë mision jetësor”, përfundoi Sekretari i Mbrojtjes i SHBA-së.
