Edhe sot, qytetarë, aktivistë dhe organizata të shoqërisë civile po protestojnë, për të kërkuar drejtësi për Arlinda Zekajn dhe përgjegjësi nga institucionet e vendit për dështimin në mbrojtjen e jetës së saj. Kësaj radhe, protesta në Prishtinë është paralajmëruar si protestë gjithëkombëtare, me thirrjen që qytetarët t`i bashkohen marshit nga të gjitha qytetet e Kosovës.
Protestuesit janë mbledhur te Katedralja “Nënë Tereza”, duke mbajtur pankarta me mesazhe kundër dhunës ndaj grave dhe kërkesa për përgjegjësi institucionale.
“Refuzojmë të nënshtrohemi!”, “A ka shtet për gratë?”, “Siguria e grave është përgjegjësi shtetërore!” dhe “Patriarkati po na merr frymën, shteti po na merr jetën”, janë disa nga mesazhet që shihen në pankartat e protestuesve.
Në mesin e pankartave është edhe mesazhi: “Sot, nesër a çdo ditë, për drejtësi kemi me u ngritë!”, përmes të cilit protestuesit shprehin kërkesën për drejtësi për Arlinda Zekajn.
Organizatorët kërkojnë përgjegjësi institucionale dhe shpalljen e femicidit si urgjencë kombëtare. Para se të vritej, Arlinda Zekaj u ishte drejtuar institucioneve për mbrojtje, duke paralajmëruar se jeta e saj ishte në rrezik.
Protestë në Prishtinë, kërkohet drejtësi për Arlinda Zekajn
