Të paktën 19 persona humbën jetën dhe 25 të tjerë u plagosën në një aksident të RËNDË me autobus në Nepal. Aksidenti ndodhi kur autobusi, i cili po udhëtonte nga destinacioni i njohur turistik Pokhara drejt kryeqytetit Katmandu, u përplas në lumin Trishuli në distriktin Dhading. Ky është një nga aksidentet më vdekjeprurëse të trafikut në Nepal në muajt e fundit, shkruan Anadolu Agency .
Zëdhënësi i policisë së Nepalit, Prakash Dahal, konfirmoi se një shtetas britanik, Stewart Dominic Ethan, ishte midis të vdekurve. Një shtetase e Zelandës së Re, Mari Evade, u plagos gjithashtu lehtë në aksident dhe u lirua nga spitali pasi mori ndihmë mjekësore.
Viktimat dhe shtetasit e huaj
Autoritetet deri më tani kanë identifikuar tetë shtetas nepalezë midis të vdekurve, ndërsa identiteti i viktimave të mbetura është ende duke u përcaktuar. Njëzet e pesë pasagjerë të plagosur u dërguan në dy spitale në Katmandu. Ekipet e shpëtimit përdorën varka për të transportuar të plagosurit nga lumi në rrugë, nga ku u çuan në qytet me ambulancë.
Sipas rezultateve të para të hetimit policor, autobusi ra nga rruga rreth 200 metra në lumin Trishuli. Ministria e Brendshme ngriti një komision hetimor me detyrën e përcaktimit të shkakut të saktë të aksidentit dhe propozimit të masave për të parandaluar tragjedi të ngjashme në të ardhmen.
