Ministria libaneze e Shëndetësisë tha se 182 persona u vranë në sulmet e sotme izraelite, numri më i lartë në një ditë të vetme që nga fillimi i sulmeve izraelite ndaj grupit militant libanez Hezbollah.Izraeli nisi një breshëri sulmesh në Bejrutin qendror dhe gjetkë në Liban, ndërsa hyri në fuqi një armëpushim i brishtë dyjavor midis Shteteve të Bashkuara dhe Iranit. Zyrtarët iranianë argumentuan se marrëveshja e armëpushimit supozohej të përfshinte Libanin, ndërsa Izraeli dhe Shtetet e Bashkuara këmbëngulën se nuk ishte kështu.
Sulmet plagosën 890 persona, tha ministria.
Një total prej 1,739 personash janë vrarë dhe 5,873 të tjerë janë plagosur në Liban në pak më shumë se pesë javë që nga shpërthimi i luftës.Më herët sot, Ministri libanez i Shëndetësisë, Rakan Nasreddin, tha se 89 persona u vranë dhe 722 të tjerë u plagosën në sulmet e sotme izraelite ndaj Libanit, të cilat ndodhën pas vendosjes së një armëpushimi dyjavor në Iran.Nasreddini tha më pas se ky nuk ishte numri përfundimtar i viktimave.
“Bombardimi izraelit i Libanit sot ishte më intensivi që nga fillimi i luftës në fillim të marsit, duke lënë dhjetëra të vdekur dhe qindra të plagosur”, tha më herët sot ministria libaneze e shëndetësisë.
Ushtria izraelite tha se kishte kryer “sulmin më të madh të koordinuar” kundër lëvizjes pro-iraniane Hezbollah që nga fillimi i konfliktit.”Të gjithë miqtë e Libanit janë të thirrur të na vijnë në ndihmë për të ndaluar këto sulme me të gjitha mjetet”, tha kryeministri libanez Nawaf Salam.
Sulmet erdhën pasi Presidenti i SHBA-së, Donald Trump, mbrëmë vonë pranoi propozimin e Pakistanit për një armëpushim dyjavor, gjatë të cilit negociatat pritet të çojnë në hapjen e plotë të Ngushticës së Hormuzit.
