Kryeministri izraelit Benjamin Netanyahu ka njoftuar se do të fillojë negociatat me Libanin sa më shpejt të jetë e mundur. Njoftimi vjen pasi Izraeli rifilloi sulmet ndaj Hezbollahut në Liban dhe pas një armëpushimi midis Iranit dhe SHBA-së. Irani dhe ndërmjetësi Pakistan kanë njoftuar se Libani është gjithashtu i përfshirë në armëpushim.”Në dritën e thirrjeve të përsëritura të Libanit për të hapur negociata të drejtpërdrejta me Izraelin, dje i dhashë udhëzime kabinetit që të fillojë negociatat e drejtpërdrejta me Libanin sa më shpejt të jetë e mundur”, njoftoi Netanyahu.
Ai deklaroi se bisedimet do të përqendrohen në çarmatosjen e Hezbollahut dhe vendosjen e marrëdhënieve paqësore midis Izraelit dhe Libanit.
Netanyahu shton se Izraeli “vlerëson thirrjen e sotme nga kryeministri libanez për demilitarizimin e Bejrutit”.
Irani ka paralajmëruar disa herë se nuk do t’i vëzhgojë me qetësi sulmet ndaj Hezbollahut, sepse beson se ky front është përfshirë edhe në armëpushimin e negociuar nëpërmjet Pakistanit. Ndërkohë, për shkak të sulmeve izraelite ndaj Libanit, Irani pezulloi hapjen e Ngushticës së Hormuzit.
Të mërkurën, Izraeli kreu sulme masive në Liban, gjatë të cilave u vranë qindra libanezë dhe shumë të tjerë u plagosën. Nipi i udhëheqësit të Hezbollahut, Naim Qassem, u vra gjithashtu në sulm, dhe objektivi dyshohet se ishte vetë udhëheqësi.
Shumë vende evropiane kanë bërë thirrje që Libani të përfshihet në armëpushim.
Donald Trump dhe administrata amerikane kanë pohuar se Libani nuk është pjesë e armëpushimit. Irani njoftoi se e shtyu sulmin ndaj Izraelit pas ndërhyrjes së ndërmjetësit Pakistan mbrëmë. Mediat amerikane raportuan se Trump i kërkoi Netanyahut të kufizonte sulmet në mënyrë që të mos rrezikonte bisedimet e planifikuara për të shtunën në Islamabad.
