Hungarezët votojnë sot në zgjedhjet që mund t’i japin fund sundimit 16-vjeçar të kryeministrit Viktor Orban, të trazojnë Rusinë dhe të trondisin qarqet e krahut të djathtë në të gjithë Perëndimin, përfshirë Shtëpinë e Bardhë të Presidentit të SHBA-së Donald Trump.
Orban, një nacionalist euroskeptik, ka krijuar një model të “demokracisë joliberale” që lëvizja “Make America Great Again” (MAGA) e Trump dhe admiruesit e saj në Evropë e mbajnë si model, shkruan Reuters. Por shumë hungarezë janë gjithnjë e më të pakënaqur me Orbanin pas tre vitesh stanjacioni ekonomik dhe rritjes së kostove të jetesës, si dhe raporteve për oligarkë të afërt me qeverinë që grumbullojnë pasuri gjithnjë e në rritje.Sondazhet e opinionit publik në dy javët e fundit kanë treguar se partia Fidesz e Orbanit është prapa Tiszës, partisë së re të qendrës së djathtë të Peter Magyar, me shtatë deri në nëntë pikë përqindjeje.
Turma të mëdha qytetarësh hungarezë që votojnë jashtë vendit janë regjistruar në qendrat e votimit në të gjithë Evropën. Radhë të gjata po formohen, ndër të tjera, në Malaga, Stokholm, Kopenhagen, Oslo dhe Mynih, me radhë që zgjasin më shumë se një orë në disa vende, raportojnë mediat hungareze.
Sipas një raportimi nga një lexues në Malaga, ku qendra e votimit është e organizuar në një hotel, votuesit me vendbanim në Budapest presin radhën e tyre për një orë deri në një orë e gjysmë. Për shkak të turmave të mëdha, votuesit me bileta avioni të blera paraprakisht, të cilët kanë udhëtuar në qytet ekskluzivisht për qëllime votimi, kanë përparësi. Ngjashëm është edhe në Stokholm, ku një lexues me adresë në Budapest priti gjithashtu një orë e gjysmë për të votuar.
Radhë të gjata u regjistruan edhe në Kopenhagen, ku votuesit, sipas lexuesve, po presin jo vetëm për të hedhur votën e tyre, por edhe për të blerë ëmbëlsirën popullore hungareze kürtőskalács. Turma njerëzish u panë edhe në qendrat e votimit në Oslo dhe Mynih, ku u vu re gjithashtu një pjesëmarrje e lartë.
Situata në Oslo është veçanërisht interesante. Sipas njërit prej votuesve, katër vjet më parë pothuajse askush nuk ishte në qendrën e votimit, ndërsa këtë vit ka radhë të gjata.
Radhë në qendrat e votimit në të gjithë Hungarinë
