Lidhja Social Demokratike e Maqedonisë (SDSM) akuzoi partinë në pushtet VMRO-DPMNE për organizimin e nisjes së qytetarëve të Maqedonisë së Veriut në një tubim në mbështetje të Presidentit serb Aleksandar Vuçiç në Beograd më 23 maj, duke e vlerësuar këtë si një “ndërhyrje të turpshme në punët e brendshme të një vendi tjetër”.
Në një deklaratë të publikuar pasi në rrjetet sociale u shpërndanë postera për një marshim të organizuar drejt një tubimi në Beograd, LSDM pretendon se pas organizatës qëndrojnë njerëz të afërt me autoritetet në Shkup, por edhe me zyrtarë në Serbi.
Po e transmetojmë të plotë njoftimin e LSDM-së:
“Ashtu siç paralajmëruam muaj më parë se Vuçiç po sundonte Maqedoninë, tani VMRO po organizon drejtpërdrejt qytetarët e Maqedonisë për një kundër-tubim në Beograd në mbështetje të Aleksandar Vuçiçit.
Posteri që po përhapet në të gjithë Maqedoninë tregon qartë: mbledhje dhe shkuarje në një tubim para konsullatës serbe në Kumanovë, me qëllim mbështetjen e Vuçiçit.
Kjo është ndërhyrje e turpshme në punët e brendshme të një vendi tjetër.
Kjo është pikërisht ajo që Parlamenti Evropian e quan “bota serbe” – ndikimi dhe ndërhyrja e drejtpërdrejtë e Serbisë në Maqedoni.
Maqedonia është nën presion dhe ndikim të vazhdueshëm nga shërbimet serbe dhe ruse.
Në këtë organizim merr pjesë zëvendëskryeministri Ivan Stoiljkoviq, bashkëpunëtori më i afërt i Mickoskit, me marrëveshje me Millosh Vuçeviqin e disa ditëve më parë.
Kjo nuk është rastësi. Kjo është pjesë e të njëjtit rrjet: Orban – Vuçiç – Mickoski.
Ndërkohë që VMRO e paraqet veten si një parti “pro-maqedonase” dhe zyrtarët e saj mbajnë pasaporta bullgare, ata i organizojnë qytetarët maqedonas që të largohen dhe të mbështesin Vuçiçin dhe “botën serbe”.
Ka mjaftueshëm interesa të huaja në tokën maqedonase. Qytetarët e shohin qartë: VMRO-ja nuk punon për Maqedoninë – ajo punon për qendrat e pushtetit të të tjerëve. Reformat tani. Evropa tani”.
