RTSH
Presidenti i Republikës së Shqipërisë, Bajram Begaj, ka reaguar zyrtarisht pas zhvillimit të Konferencës së 8-të Ndërqeveritare mes Shqipërisë dhe Bashkimit Evropian, duke e vlerësuar këtë zhvillim si një etapë përcaktuese që hap fazën e mbylljes së negociatave për anëtarësimin e vendit në strukturat evropiane
Përmes një mesazhi publik, Kreu i Shtetit theksoi rëndësinë e këtij procesi si një përmbushje e synimeve strategjike të shtetit shqiptar, duke e pozicionuar integrimin si një aspiratë mbarëkombëtare.
“Integrimi evropian është projekt kombëtar, është aspirata e brezave të shqiptarëve për një Shqipëri më demokratike, më të drejtë, më të zhvilluar dhe më dinjitoze në familjen evropiane”, theksoi Kreu i Shtetit në mesazhin e tij, duke përcjellë urimet për qytetarët për këtë arritje diplomatike dhe institucionale.
Në vlerësimin e tij mbi ecurinë e mëtejshme të këtij procesi, Begaj nënvizoi se ky përbën një moment historik që kërkon një angazhim edhe më të lartë në fazat pasuese të shtetndërtimit dhe përafrimit të legjislacionit.
“Sot, Shqipëria hodhi një tjetër hap të rëndësishëm drejt familjes evropiane. Konferenca e 8-të Ndërqeveritare Shqipëri-BE është një moment historik në rrugëtimin e pakthyeshëm evropian të Shqipërisë. Rruga vazhdon me më shumë besim, përgjegjësi dhe përkushtim”, përfundon deklarata e Presidentit të Republikës lidhur me procesin e mbetur drejt anëtarësimit të plotë.
