Edhe pse shumë udhëtarë kanë paralajmëruar vitet e fundit se Tenerife nuk është më destinacioni i përballueshëm që ishte dikur, një turist përdori mediat sociale për të treguar se është ende e mundur të gjesh një vakt shumë të lirë atje.
Në një video që u bë shpejt virale, ai zbuloi mëngjesin që hëngri në vendpushimin popullor të Los Cristianos për vetëm 4.60 euro. Ndjekësit e tij nuk u habitën vetëm nga çmimi i ulët, por edhe nga sasia e ushqimit që mori,raporton Metropolitan.
Në pjatën e tij kishte dy feta bukë të thekur, dy salçiçe, domate të skuqura, dy vezë, proshutë, gjalpë dhe salcë. Ai shpjegoi se vakti normalisht do të përfshinte fasule të pjekura, por e anashkaloi atë pjatë anësore.
“Shumë njerëz thonë se Tenerife nuk është më i lirë, por ky mëngjes vërteton të kundërtën”, tha ai në një video të xhiruar në një restorant me pamje nga deti.
Ai u impresionua veçanërisht nga fakti që pagoi për të gjithë vaktin pothuajse aq sa do të paguante për një pije në një pub tipik britanik.
“Me çmimin e një pinte birre mora një mëngjes të plotë anglez në diell, me pamje nga deti”, tha ai.Postimi shpejt mori mijëra shikime dhe komente të shumta. Ndërsa disa përdorues menduan se ishte një ofertë e shkëlqyer, të tjerë nuk u impresionuan nga përzgjedhja ose cilësia e ushqimit. Një nga komentet më të pëlqyera nxori në pah zgjedhjen e pazakontë të turistit: “Udhëtove në Spanjë për të ngrënë një mëngjes anglez”.
Shumë veta shkruan se do të preferonin të provonin specialitete lokale gjatë pushimeve sesa gatime që mund të hanin në shtëpi, ndërsa të tjerë theksuan se do të duhej të paguanin shumë më tepër për një vakt të ngjashëm në Mbretërinë e Bashkuar. Megjithatë, jo të gjithë e ndanin entuziazmin e tyre.
Disa komentues menduan se ushqimi dukej i lirë dhe se cilësia e përbërësve ndoshta nuk ishte e një standardi të lartë.
“Ushqim i lirë, shije e lirë”, shkroi një përdorues, ndërsa një tjetër shtoi: “Për këtë çmim, cilësia e mishit definitivisht nuk është e klasit të parë”.
Kishte edhe nga ata që thjesht e gjetën mëngjesin të papëlqyeshëm.
Pavarësisht mendimeve të ndryshme, njoftimi ka rihapur debatin rreth asaj se sa kushtojnë pushimet në Tenerife sot dhe nëse është ende e mundur të gjesh oferta gastronomike të përballueshme në këtë Ishull të njohur Kanarie.
