Autoritetet në Limasol po hetojnë një rast të vjedhjes së bizhuterive me vlerë gati 10 milionë euro . Një burrë 54-vjeçar, i cili ishte ngarkuar me gjetjen e blerësve për bizhuteritë, dyshohet se është “zhdukur” së bashku me sendet me vlerë dhe tani kërkohet nga autoritetet me një urdhër arresti.
Viktima e vjedhjes është një biznesmen 57-vjeçar, pronar i një kompanie prodhimi bizhuterish të çmuara jashtë vendit.
Sipas mediave qipriote, biznesmeni u takua me 54-vjeçarin (me të cilin kishte punuar në të kaluarën) dhe i dorëzoi bizhuteritë, me qëllim që ky i fundit të gjente blerës. Të dy burrat madje nënshkruan një marrëveshje me shkrim.Të hënën në mbrëmje, ishte planifikuar një takim me 54-vjeçarin, por ai nuk u paraqit në takim .
Pronari i kompanisë është përpjekur vazhdimisht ta kontaktojë atë, por 54-vjeçari mbetet i zhdukur, ndërsa hetimet për ta gjetur atë dhe bizhuteritë janë në kulmin e tyre.
