Komuna e Skenderajt ka njoftuar se ka ndërruar jetë Sahit Jashari, një ndër bashkëluftëtarët më të hershëm të Komandantit Legjendar Adem Jashari dhe një nga themeluesit dhe ushtarët e parë të Ushtrisë Çlirimtare të Kosovës.
“Jeta dhe veprimtaria e Sahit Jasharit janë të lidhura ngushtë me periudhat më të rëndësishme të përpjekjeve të popullit të Kosovës për liri. Si pjesë e gjeneratës së parë të luftëtarëve të UÇK-së, ai dha kontribut të çmuar në rrugën e lirisë dhe të çlirimit të vendit, duke mbetur gjithmonë shembull i përkushtimit, guximit dhe atdhedashurisë”, theksohet në njoftim.
Komuna ka vlerësuar se ndarja e tij nga jeta është humbje e madhe për familjen Jashari, bashkëluftëtarët, Skenderajn dhe gjithë Kosovën.
Në njoftim po ashtu thuhet se ceremonia mortore do të organizohet nën patronatin e kryetarit të Komunës së Skenderajt, Sami Lushtaku, ndërsa detajet do të bëhen të ditura më vonë.
