Zyrtarët policorë të Rajonit të Prishtinës kanë vazhduar aktivitetet intensive në funksion të zbatimit të ligjit dhe garantimit të sigurisë publike, duke realizuar rezultate të konsiderueshme gjatë javës së kaluar.
Sipas Policisë, në lokacione të ndryshme dhe përmes aksioneve të ndara janë ekzekutuar gjithsej 212 urdhëresa të gjykatave. Prej tyre, 61 urdhëresa kanë qenë të lidhura me vepra penale, ndërsa pjesa tjetër ka pasur të bëjë me kundërvajtje, pjesëmarrje në seanca gjyqësore, verifikime dhe procedura të tjera ligjore.
Pas përfundimit të procedurave policore, personat e dënuar me burgim janë dërguar për vuajtjen e dënimit, ndërsa ata të dënuar me gjobë janë liruar pasi kanë përmbushur obligimet e përcaktuara në urdhëresat përkatëse.
Aktivitetet e Policisë janë shtrirë edhe në fusha të tjera të sigurisë. Gjatë kësaj periudhe janë sekuestruar katër armë zjarri të llojeve dhe kalibrave të ndryshëm, si dhe një sasi municioni.
Ndërkohë, kontrollet dhe masat në trafikun rrugor kanë vazhduar me intensitet të shtuar. Gjatë javës së kaluar, policia ka shqiptuar gjithsej 3,595 gjoba për shkelje të ndryshme të rregullave të komunikacionit rrugor.
Nga numri i përgjithshëm i kundërvajtjeve të evidentuara, 591 janë regjistruar përmes përdorimit të veturave inteligjente dhe automjeteve të pajisura me radar mobil.
Policia e Kosovës ka bërë të ditur se aktivitetet e tilla do të vazhdojnë edhe në ditët në vijim, me qëllim të forcimit të rendit dhe sigurisë publike, si dhe rritjes së sigurisë në trafik.
