Ekrem Bajroviqi është shpallur sërish fajtor në rigjykim dhe është dënuar me 12 vjet burgim për krime lufte kundër popullatës civile në fshatin Saradran.
Aktgjykimi u shpall të premten nga kryesuesi i trupit gjykues, Avni Syla, i cili njoftoi se Bajroviqi u shpall fajtor për veprën penale të krimit të luftës ndaj popullatës civile në bashkëkryerje.
Gjykata vendosi që në dënimin prej 12 vjetësh t’i llogaritet edhe koha e kaluar në paraburgim, duke filluar nga 19 tetori 2022, ndërsa masa e paraburgimit do të vazhdojë deri në plotfuqishmërinë e aktgjykimit. Bajroviqi u detyrua gjithashtu të paguajë 300 euro shpenzime gjyqësore dhe 100 euro për kompensimin e viktimave të krimit. Palët kanë të drejtë ankese në afat prej 30 ditësh në Gjykata e Apelit e Kosovës.
Sipas aktakuzës, Bajroviqi, në cilësinë e policit në Stacionin Policor në Gurrakoc, më 8 maj 1999, në bashkëpunim me pjesëtarë të forcave serbe, ndaloi një kolonë civilësh shqiptarë që po largoheshin drejt Shqipëri. Nga kolona u ndaluan 16 burra, të cilët, sipas aktakuzës, u rrahën dhe më pas u pushkatuan. Njëri prej tyre, i identifikuar me inicialet N.E., mbijetoi pasi u plagos rëndë dhe u la mes trupave të viktimave.
Aktakuza e ngarkon Bajroviqin edhe për ngjarjet e 7 majit 1999 në Saradran, ku pretendohet se mori pjesë në arrestimin dhe keqtrajtimin e 84 civilëve shqiptarë. Sipas prokurorisë, civilët u ndanë nga kolona, u morën paratë dhe sendet me vlerë, më pas u dërguan në Gurrakoc, ku u maltretuan dhe u torturuan, përpara se të transferoheshin në stacionin policor, ku, sipas aktakuzës, kolonës i printe Bajroviqi.
