Kryetari i Aleancës, Ardian Gjini, gjatë fjalimit të tij në “Marshin për Liri”, ka mbrojtur luftëtarët e Ushtrisë Çlirimtare të Kosovës (UÇK) dhe ish-krerët e saj, duke thënë se ata nuk duhet të persekutohen për luftën që zhvilluan gjatë viteve 1998-1999.
Gjini deklaroi se UÇK-ja kishte luftuar kundër forcave serbe, të cilat, sipas tij, kanë kryer vrasje, dhunime dhe krime ndaj popullsisë shqiptare në Kosovë.
“Kanë luftuar kundër atyre që i kanë mbushur kamionët frigoriferikë me trupa të bashkëqytetarëve tanë shqiptarë, vajza të reja, pleq e gra. Kanë luftuar kundër atyre që kanë dhunuar mijëra gra në Kosovë”, tha Gjini.
Ai u shpreh se luftëtarët e UÇK-së, përfshirë ish-komandantët dhe ushtarët e saj, nuk duhet të trajtohen si përgjegjës për luftën çlirimtare.
“Qysh mundet me pas faj një popull, qysh mujnë me pas faj njerëzit që e kanë kap pushkën për liri?”, deklaroi ai.
Gjini iu referua edhe pretendimeve për krime të kryera gjatë luftës në Kosovë, duke thënë se personat ndaj të cilëve luftoi UÇK-ja ishin, sipas tij, përgjegjës për dhunën ndaj shqiptarëve.
“Kanë luftuar kundër të njëjtëve njerëz që kanë ardhur këtu për të vrarë shqiptarë. Kundër atyre kanë luftuar. E qysh mundet me pas faj?”, tha ai.
Në fjalimin e tij, Gjini kërkoi që luftëtarët e UÇK-së të respektohen për kontributin e tyre dhe kundërshtoi, siç tha ai, “persekutimin” e tyre ndër vite.
“Kushdo që një ditë e ka kapur pushkën për të luftuar për vendin e vet, e meriton me e ngritë kapelën secili dhe me i thënë: faleminderit për shërbimin”, u shpreh Gjini.
Gjini u shpreh se Kosova do ta presë edhe vendimin për ish-krerët e UÇK-së, por shtoi se, sipas tij, historia e luftës për liri nuk mund të njolloset.
“Kemi me i prit edhe tri ditë edhe 19 orë. Poshtërsia më e thellë njerëzore është që ata që e kanë kryer krimin i akuzojnë të tjerët për krime. Kurrë askush nuk ka me mbërritë me ndot tregimin tonë për liri”, deklaroi Gjini.
Fjalimi i tij u mbajt në kuadër të “Marshit për Liri”, ku pjesëmarrësit shprehën mbështetje për ish-krerët e UÇK-së që po përballen me proces gjyqësor në Hagë
