Nga protestat te fleta e votimit: studentët në Serbi u regjistruan për zgjedhjet
Studentët, të cilët prej gati dy vitesh zhvillojnë protesta kundër qeverisë në Serbi, dorëzuan dokumentet për pjesëmarrje në zgjedhjet e parakohshme parlamentare të 25 tetorit, raportoi BTA. Ata dorëzuan në Komisionin Republikan të Zgjedhjeve në Beograd shumë më tepër se 10 000 firmat e kërkuara, si dhe një listë me 250 kandidatë për deputetë me emrin “Lista Studentore – Studentët Fitojnë”.
Mes kandidatëve ka profesorë, mjekë, artistë, aktivistë dhe sipërmarrës. Lëvizja thotë se ata janë zgjedhur përmes plenumeve studentore, mbi parimin e demokracisë së drejtpërdrejtë.
Protestat nisën pas shembjes së një tende të stacionit hekurudhor në Novi Sad më 1 nëntor 2024, ku humbën jetën 16 persona dhe një tjetër u plagos rëndë. Studentët bllokuan mbi 60 fakultete, akuzuan autoritetet për incidentin dhe parashtruan kërkesa kundër korrupsionit. Në maj 2025 ata kërkuan zgjedhje të parakohshme parlamentare dhe e arritën këtë qëllim.
FOTO: BGNES
Ish-presidenti i Kosovës Hashim Thaçi u dënua me 25 vjet burg
Gjykata Speciale për Kosovën në Hagë dënoi ish-presidentin e Kosovës Hashim Thaçi dhe tre ish-drejtues të tjerë të Ushtrisë Çlirimtare të Kosovës (UÇK) për krime lufte të kryera gjatë konfliktit të viteve 1998–1999. Thaçi dhe Jakup Krasniqi u dënuan me nga 25 vjet burg, Kadri Veseli me 18 vjet, ndërsa Rexhep Selimi me 13 vjet.
Vendimet mund të apelohen.
Ata u arrestuan dhe u mbajtën në paraburgim në Hagë më 4 dhe 5 nëntor 2020, pas konfirmimit të aktakuzës ndaj tyre për krime të dyshuara lufte dhe krime kundër njerëzimit.
Arestimi i zgjatur i ish-udhëheqësve shkaktoi më herët gjatë këtij viti protesta paqësore në mbështetje të tyre, ndërsa lajmi për shpalljen e tyre si fajtorë solli reagime të ashpra në Shqipëri dhe Kosovë – një pjesë e konsiderueshme e opinionit publik dhe politik shqiptar i percepton Thaçin dhe të pandehurit e tjerë si simbole të UÇK-së dhe të luftës për çlirimin e Kosovës nga regjimi serb.
FOTO: BGNES
Eksporti i bllokuar nxori mbi 1000 blegtorë rumunë në rrugë
Mbi 1000 blegtorë protestuan në Bukuresht, duke kërkuar dorëheqjen e kreut të Autoritetit Kombëtar Sanitar-Veterinar, Alexandru Bociu. Ata e akuzojnë atë për mënyrën se si ka trajtuar vatrat e murtajës ose lisë së deleve në vend, gjë që ka çuar në bllokimin e eksportit të kafshëve të gjalla, dhe kërkojnë hapjen e tregjeve dhe kompensime për kafshët e asgjësuara, raportoi BTA.
Protesta nisi në mënyrë paqësore, nën prani të shtuar të policisë, por më vonë u shndërrua në përleshje. Një pjesë e protestuesve çau kordonin e policisë dhe hodhi sende në drejtim të forcave të rendit. Gjatë përleshjeve u plagosën 10 efektivë të policisë, ndërsa 47 pjesëmarrës u shoqëruan në polici për shkelje të rendit publik, njofton Agerpres. Sipas autoriteteve, mes protestuesve mund të kenë pasur provokatorë.
Në qershor, Komisioni Evropian e zgjati deri më 31 dhjetor 2026 ndalimin e eksportit të deleve dhe dhive nga Rumania, për shkak të shfaqjes së një vatre të re të murtajës. Sipas vlerësimit të Komisionit, ekziston një rrezik i shtuar për përhapjen e sëmundjes, thekson BTA.
FOTO: Genesis Athens
Një foshnjë nga një embrion 22-vjeçar riktheu dritën në një familje greke
Pas një humbjeje të rëndë, një familje në Greqi mirëpriti një jetë të re. Hristina Rapti-Dzelepi, 54 vjeçe, lindi në Athinë një vajzë të shëndetshme nga një embrion i ngrirë më shumë se 22 vjet më parë.
Embrioni ishte ruajtur që nga viti 2004, kur, pas një procedure fertilizimi in vitro, familja kishte pasur një djalë. Në tetor 2025, ai humbi jetën në një aksident rrugor në moshën 21-vjeçare. Disa muaj më vonë, prindërit vendosën të përdornin një nga embrionet e tjera të ngrira. Kështu, më 9 shtator 2026, që në përpjekjen e parë, atyre u lindi një vajzë me peshë 3,490 kg, shkruan Medical Xpress.
Prindërit tregojnë se vajza nuk mund ta zëvendësojë djalin që humbën, por pas një periudhe pikëllimi të paimagjinueshëm, ardhja e saj në jetë solli sërish “shpresë dhe dritë” në shtëpinë e tyre.
Mjekët e cilësojnë rastin si një rekord të mundshëm ndërkombëtar për lindje të suksesshme nga një embrion i vetë çiftit, i ruajtur për një periudhë kaq të gjatë. Mosha e nënës – 54 vjeç – është kufiri maksimal i lejuar në Greqi për procedurat e fertilizimit in vitro.
