Një 33-vjeçar është arrestuar në Kaçanik, pasi dyshohet se ka sulmuar dhe kanosur prindërit e tij.
Sipas njoftimit, rasti ka ndodhur rreth orës 10:45, pasi policia ka pranuar një njoftim për një mosmarrëveshje ndërmjet disa personave në një rrugë të qytetit.
Njësitë policore kanë dalë menjëherë në vendin e ngjarjes, ku kanë konstatuar se i dyshuari kishte sulmuar dhe kanosur prindërit e tij. Dy viktimat janë dërguar në Qendrën e Mjekësisë Familjare në Kaçanik për trajtim mjekësor, ndërsa më pas janë shoqëruar në stacionin policor për procedurat e nevojshme. Lidhur me rastin është intervistuar edhe një dëshmitar.
Edhe i dyshuari ka marrë trajtim mjekësor, pasi kishte deklaruar se nuk ndihej mirë.
Pas konsultimit me prokurorin e shtetit, është iniciuar rasti për veprat penale “Sulm” dhe “Kanosje”, ndërsa i dyshuari është ndaluar për 48 orë për procedura të mëtejshme hetimore.
