Ylli amerikan i muzikës dhe mbretëresha e popit, Madonna, performoi në eventin World Pride, i cili po mbahet në Amsterdam këtë vit, pas Paradës së Krenarisë, dhe ylli surprizë në performancën e saj ishte këngëtarja australiane e popit Kylie Minogue.
Madonna doli në skenë në orët e para të mëngjesit të së dielës dhe performoi për rreth gjysmë ore, raportoi transmetuesi publik holandez NOS. Shfaqja filloi rreth orës 2:30 të mëngjesit. Këngëtarja performoi kryesisht këngë nga
albumi i ri “Confessions II” , ndërsa e përfundoi koncertin me hitet “Sorry” dhe “Hung Up” nga albumi “Confessions on a Dance Floor” i vitit 2005.
Gjatë performancës së këngës “Love Sensation”, Madonnës iu bashkua në skenë
Kylie Minogue , e cila qëndroi deri në fund të performancës. Madonna njoftoi performancën e saj në
Amsterdam të mërkurën nëpërmjet Instagram-it.
Një ditë më parë, në kanalet e Amsterdamit u mbajt Parada tradicionale e Varkave, e cila kaloi pa incidente dhe mblodhi disa qindra mijëra vizitorë.
Kryeministri holandez në Pride
Kryeministri holandez Rob Jetten mori pjesë në Paradën e Krenarisë , duke u bërë kryeministri i parë holandez që e bën këtë, dhe iu bashkuan zyrtarë të tjerë, përfshirë Ministrin e Drejtësisë Dylan Jeshilges dhe Kryetaren e Bashkisë së Amsterdamit Femke Halsema.
Jeten deklaroi se pranimi i komunitetit LGBTQIA+ është nën presion në të gjithë botën, përfshirë Holandën, dhe se kjo është arsyeja pse është e rëndësishme të vazhdohet të mbrohet barazia.
