Punëtorët e Ndërmarrjes Publike Banesore kanë protestuar para objektit Komunal të Prishtinës për moskryerjen e obligimit të pagave dymujore për ta nga themeluesi, Kuvendi Komunal i Prishtinës.
380 punëtorë të Ndërmarrjes Publike Banesore, për shkak të mos pagesës së pagave për dy muaj nga themeluesi i ndërmarrjes, Komuna e Prishtinës, kanë protestuar para objektit të komunës.
Ata kanë deklaruar se durimit të tyre i ka ardhur fundi dhe se shpresa e vetme e tyre është që përmes protestës të zgjojnë ndërgjegjen e themeluesit për gjendjen e rëndë socio-ekonomike në të cilën ndodhen.
“Për institucionet paga mund të jetë administrative por për n kjo pagë është bukë familjes e siguria e jonë e përditshme, nuk po kërkojmë mëshirë, nuk po kërkojmë lëmoshë, po kërkojmë vetëm të drejtën tonë elementare, marrjen e pagës mujore që e kemi fituar me djersën tonë është e dhembshme që punëtori të dalë në protestë të kërkoj të drejtën e tij”, tha Xhevat Prebreza, anëtar i këshillit organizativ të protestës.
Punëtorët thonë se do të detyrohen të ndërpresin kryerjen e shërbimeve për klientët.
“Ne po kërkojmë atë që e kemi fituar me punë, ne nuk do të ndalemi me kaq.Po ashtu i njoftojmë qytetarët që përderisa të vazhdoj kjo gjendje e mos marrjes së pagave me dëshirën tonë do të ndërpriten të gjitha shërbimet tona”, tha Prebreza.
Protesta është shpërndarë e qetë, ndërsa punëtorët kanë shprehur shpresën se zyrtarët komunalë do t’i takojnë në ditët në vijim, me qëllim të gjetjes së një zgjidhjeje për problemin e pagave.
