Në Kongon Lindore, një grup të rinjsh vranë një teknik mjekësor i cili po punonte me pacientë me Ebola. Kolegët e tij u strehuan dhe tani janë nën mbrojtjen e policisë, konfirmuan zyrtarët e shëndetësisë. Ky është sulmi i fundit në një seri sulmesh të nxitura nga përhapja e dezinformatave, raporton Reuters .
Sulmi ndodhi të premten në qytetin Bafwasende, në provincën Tshopo. Tekniku i vrarë, i cili punonte në spitalin e përgjithshëm lokal, po edukonte popullsinë rreth sëmundjes dhe masave për t’u mbrojtur nga Ebola. “Jemi të tronditur që popullsia është kthyer kundër këtij burri. Është e pabesueshme që e ngatërruan me një të huaj”, tha një zyrtar lokal i shëndetësisë.
Zyrtari shtoi se kolegu i teknikut i mbijetoi sulmit dhe po shërohet në spital. Punonjës të tjerë të shëndetësisë janë strehuar në spitalin e përgjithshëm, ku janë nën mbrojtjen e policisë sepse kanë frikë të kthehen në shtëpitë e tyre. Ushtria është vendosur gjithashtu përkohësisht në zonë. “Asnjë punonjës mjekësor nuk ka fjetur në shtëpi sepse kanë frikë për sigurinë e tyre”, shtoi ai.
Epidemia dhe mosbesimi
Tshopo është një nga tetë provincat kongoleze ku lloji Bundibugyo i Ebolës po përhapet me shpejtësi. Sipas të dhënave të publikuara të premten nga Instituti Kongolez i Shëndetit Publik, 9,964 raste të infeksionit janë konfirmuar që nga shpallja e epidemisë në maj dhe shkalla e vdekshmërisë është rreth 48.6 përqind.
Sulmet kanë synuar spitalet, automjetet dhe stafin që punon për të frenuar Ebolën. Kjo tregon thellësinë e problemit të mosbesimit të njerëzve vendas ndaj ekipeve shëndetësore. I njëjti zyrtar vendas tha se të rinjtë në zonë kishin sulmuar më parë një punonjës shëndetësor dhe i kishin vënë flakën shtëpisë së tij, por ai nuk specifikoi se kur ndodhi sulmi.
Përhapja e dezinformatave kërcënoi punonjësit e shëndetësisë në Kongon lindore edhe para shpërthimit të epidemisë së Ebolës. Në provincën Tshopo, disa punonjës u vranë pasi u akuzuan padrejtësisht për përhapjen e një sëmundjeje fiktive që dyshohet se shkakton atrofi gjenitale mashkullore.
“Vrasja e teknikut mjekësor në Bafwasende është një humbje për luftën kundër Ebolës dhe një humbje edhe më e madhe për pacientët”, shkroi të dielën në rrjetin social X Julien Harneis, koordinatori i lartë i Kombeve të Bashkuara për Ebolën.
