Një bjeshkatar me shtetësi gjermane është shpëtuar të hënën në zonën e majës së Lubotenit, pasi pësoi lëndime të shumta trupore gjatë një aktiviteti bjeshkatar.
Sipas njoftimit, Shërbimi i Kërkim-Shpëtimit Malor të Kosovës (ShKShMK) ka pranuar një thirrje emergjente për ndihmë nga zona e Lubotenit.
Një grup bjeshkatarësh nga vende të ndryshme të Evropës po zhvillonin aktivitet në këtë zonë, kur gjatë kthimit një 48-vjeçar me inicialet P.J. ka rrëshqitur në faqen lindore të mbuluar me borë, duke rënë rreth 500 metra në terren të thepisur, çka i ka shkaktuar lëndime dhe pamundësi për lëvizje.
Pas pranimit të informatave dhe koordinatave të vendngjarjes, ShKShMK mobilizoi dy skuadra të shpëtuesve malorë dhe nisi operacionin e kërkim-shpëtimit.
Ekipet i ofruan ndihmën e parë të lënduarit, bënë imobilizimin e tij dhe realizuan evakuimin në kushte të vështira malore.
I lënduari është bartur me metoda specialistike të shpëtimit malor dhe më pas është transportuar me automjete 4×4 deri te pika e takimit me autoambulancën.
Sipas njoftimit, gjendja e tij shëndetësore raportohet stabile.
Operacioni është zhvilluar në koordinim me Policinë e Kosovës, Ambasadën Gjermane, Shërbimin e Urgjencës në Ferizaj dhe autoritetet tjera relevante.
