Albi Superliga e Kosovës në futboll do të vazhdojë në mesjavë me ndeshjet e javës së shtatë.
Nga kjo javë spikat derbi mes rivalëve lokal, Dritës dhe Gjilanit, që do të zhvillohet më 14 shtator.
Në po të njëjtën ditë do të zhvillohet edhe ndeshja Prishtina – Malisheva.
Më 15 shtator do të zhvillohen dy ndeshje tjera. Trepça ’89 e pret Ferizajn, teksa Drenica i shkon Dukagjinit.
Ndërkaq, përballja mes Llapit dhe Ballkanit do të zhvillohet në një datë tjetër.
Skuadra nga Suhareka nuk mund të luajë këtë ndeshje, pasi që në të enjten e 15 shtatorit do të takohet me Slavia Praguen në Ligën e Konferencës.
