Kryeministri Albin Kurti po i numëron me kujdes ditët pas ardhjes në pushtet. Në mbledhjen e 96’të të Qeverisë ai ka treguar se në javën ardhshme bëhet 1 vit e gjysmë, të cilën e ka quajtur “demokratike e progresiste”.
“Mirë se e gjejmë njëri tjetrin në mbledhjen e 96-të të Qeverisë së Republikës së Kosovës” ka qenë fjala përshëndetëse e Kurtit.
“Në javën e ardhshme shënojmë 1 vit e gjysmë të qeverisjes sonë demokratike e progresiste. Kthesa që kemi marrë drejt zhvillimit të shoqërisë, nuk mund të jetë e qëndrueshme pa sundim të ligjit, siguri juridike e zbatim të të drejtave të njeriut. Pra, për të jetësuar ndryshimin e mirëfilltë demokratik vëmë theks mbi rendin dhe ligjin, parashikueshmërinë juridike dhe barazinë” ka thënë Kryeministri.
Ai pastaj ka theksuar se “në vetëm 1/3 e mandatit kemi kaluar mbi 150 projektligje”.
“Ndërkaq, në gjysmën e parë të këtij viti janë miratuar 87 sosh në Kuvendin e Republikës. Këtë javë ka rifilluar punën Kuvendi. Nesër do ta kemi seancën e parë të sesionit vjeshtor dhe urojmë që ky sesion të jetë edhe më i suksesshëm. Shifrat rekorde korrespondojnë me vullnetin e kontributin ndaj fuqizimit të shtetit mbi parimet më të mira që mbrojnë të drejtat e liritë themelore dhe pamundësojnë shmangien nga zbatimi i ligjit” ka shtuar Kurti.
Tutje ka theksuar se Qeveria ka fuqizuar mekanizmat për luftimin e krimit dhe të korrupsionit.
“Përmes projektligjeve të miratuara kemi fuqizuar mekanizmat për luftimin e krimit dhe të korrupsionit nëpërmjet reformës në Këshillin Prokurorial, deklarimin më efikas dhe transparent të pasurisë, potencimin e rolit parandalues të Agjencisë Kundër Korrupsionit dhe inicimit të konfiskimit të pasurisë së pajustifikueshme” ka theksuar ai.
Kurti ka potencuar se Qeveria ka ngritur llogaridhënien ndaj qytetarit përmes projektligjit për Financimin e Subjekteve Politike e atij për Qeverinë duke e përmendur edhe themelimin e Gjykatës Komerciale.
“Sot do të trajtojmë projektligjin për Prokurorinë Speciale e atë për Prokurorin e Shtetit” ka pohuar Kurti.
Shefi i qeverisë në fjalën e tij tha se vettingu si reformë thelbësore në sistemin e drejtësisë, të cilën ia kemi besuar përfaqësuesve të popullit, vazhdojmë me trajtimin e temës nga e cila varet stabiliteti e kohezioni social.
