Dardan Molliqaj, kreu i Partisë Socialdemokrate, nëpërmjet një postimi në Facebook ka bërë të ditur se kanë marrë përkrahjen e Shoqatës së Veteranëve të Luftës të Gjilanit, Kamenicës e Vitisë për protestën e së mërkurës.
“Protestojmë së bashku”, ka shkruar Molliqaj, duke iu referuar ditës kur pritet që Ekatarina Trendafilova të vizitojë Gjilanin.
Ai nëpërmjet një postimi në Facebook ka shkruar se Gjykata Speciale është e padrejtë dhe ka shkelur barazinë dhe të drejtat e njeriut.
“Vizitat për matje të opinionit publik e rregullim të imazhit të saj me takime të mbyllura janë të padëshirueshme.”, ka thënë ai.
Ky është postimi i plotë:
Protestojmë së bashku!
Sot, së bashku me Qëndronin, takuam udhëheqësit e Shoqatës së Veteranëve të Gjilanit, Kamenicës dhe Vitisë, të cilët ofruan mbështetje për protestën e së mërkurës në Gjilan.
Gjykata Speciale është e padrejtë qysh në fillim. Ajo e ka shkelur kriterin e barazisë mes palëve dhe të drejtat e njeriut. Vizitat për matje të opinionit publik e rregullim të imazhit të saj me takime të mbyllura janë të padëshirueshme.
Prandaj, të mërkurën, nga ora 10:00, Hotel “Astoria”, Gjilan ku do të zhvillohet takimi i znj.Trendafilova, protestojmë kundër kësaj vizite!. /Kosovatimes/
