Lëvizja Vetëvendosje sot ka publikuar edhe një video në faqen zyrtare përmes së cilës bën të ditur se terminali i Kosovës në Portin e Durrësit ka filluar punën këtë javë.
Por, në video thuhet se në Kosovë terminalet kanë qenë në pronësi private të lidhura ngushtë me politikën, ku ndër emrat e përmendur ishin edhe djemtë e ish-kryeministrit, Isa Mustafa.
E pas kësaj, ka reaguar djali i këtij të fundit, Besnik Mustafa i cili u shpreh se këto akuza janë shantazhime dhe kërcënime.
“Sot, si djem të Isa Mustafës, u akuzuam dhe u shantazhuam nga mediat e VV-së, -parti në pushtet për Terminal Doganor. Kompania “Intereuropa” me veprimtari themelore depo doganore publike, transport dhe shpedicion është kompani Sllovene me seli në Koper të Sllovenis. Por pushteti, për nevoja të propagandës, kompaninë Sllovene dhe terminalin e saj e bënë të familjes tonë. E gjithë kjo për të shantazhuar dhe kërcënuar në emër të Byros së tyre politike për konfiskim” ka shkruar ai.
Tutje, ai përmes shkrimit në Facebook iu drejtua VV-së, duke i thënë që të sqarojnë pronësitë e kompanive.
“E unë u them, urdhëroni dhe konfiskone ose mbylleni këtë kompani , por do të keni punë me Shtetin Slloven e jo me familjen Mustafa, sepse nuk është e familjes sonë, por para se ta bëni bisedoni me shtetin Slloven. Nuk është as e LDK-së, prej së cilës frikësoheni aq shumë. Jeni në pushtet, i keni të gjitha mundësitë për të sqaruar pronësitë e kompanive, themeluesit e tyre dhe fitimet që ato i realizojnë edhe në rastin e terminalit që na e mveshni neve, që në fakt është gënjeshtër e konstruktuar, si për pronësinë ashtu edhe për fitimet. Për gjera të tilla, shantazhim, tentime frikësimi konstruksione të rrejshme edhe bartësit e pushtetit japin llogari para ligjit”, thuhet në postimin e tij. /Kosovatimes/
