Ushtruesi i Detyrës së Kryeprokurorit të Shtetit z. Besim Kelmendi, ka pritur në takim Ministrin e Drejtësisë të Republikës së Shqipërisë, z. Ulsi Manja, i cili ishte i shoqëruar nga Ambasadori i Republikës së Shqipërisë në Kosovë, z. Qemal Minxhozi dhe nga Ministrja e Drejtësisë e Republikës së Kosovës, znj. Albulena Haxhiu.
U.D. Kryeprokurori Kelmendi dhe Ministri Manaj kanë zhvilluar një bisede përmbajtjesore lidhur me bashkëpunimin në fushën e drejtësisë penale, me theks të veçantë për intensifikimin e veprimeve të ndërsjella në parandalimin dhe luftimin e krimit të organizuar dhe luftimin e të gjitha veprave të tjera penale në funksion të forcimit të sundimit të ligjit në të dyja vendet.
Po ashtu, ata shkëmbyen përvojat e tyre lidhur me sfidat dhe të arriturat e institucioneve përkatëse, pikëpamjet për mundësinë e krijimit të ekipeve të përbashkëta të hetimit dhe rritjen e bashkëpunimit ndërmjet institucioneve të drejtësisë së Republikës së Kosovës dhe Republikës së Shqipërisë, ndarjen e përvojave në mbrojtjen e dëshmitarëve, shkëmbimin e informatave dhe çështje të tjera nga fusha e drejtësisë penale.
Në fund, U.D. Kryeprokurori i Shtetit, Besim Kelmendi, ka falënderuar Ministrin e Drejtësisë të Republikës së Shqipërisë z. Ulsi Manja, për vizitën në institucionin e Prokurorit të Shtetit, me ç’rast të dyja palët u pajtuan që të thellohet edhe më shumë bashkëpunimi dhe ndërveprimi i përbashkët ndërinstitucional. /Kosovatimes/
