Shumica e importit të energjisë elektrike që kap vlerën e më shumë se 80 milion euro është bërë nga kompanitë serbe. Kështu u tha në mbledhjen e Komisioni Hetimor Parlamentar në lidhje me procesin e vendimmarrjes në sektorin e energjisë për periudhën 2006-2022, në nivelin legjislativ, ekzekutiv, rregullator dhe në ndërmarrje publike.
Para anëtarëve të komisionit ka dëshmuar ish kryeshefi i kompanisë KOSTT, Fadil Ismajli, ku ka folur për rolin e KOSTT-it në tregtimin e energjisë, për çka ka thënë se i njëjti nuk është në kompetencën saj, mirëpo në cilësinë e operatorit të tregut vetëm i përcakton rregullat e palëve se si të sillen në treg.
Megjithatë, ai bëri të ditur se Kosova në periudhën 2006-2008 më së shumti ka importuar energji nga IFT Grup nga Serbia. Sipas tij, në bazë të komunikimeve që ka pasuar në atë kohë me KEK-un, i është thënë se kjo kompani është ofertuesja më e lirë.
“KOSTT në portofolin e vet nuk e ka tregtimin e energjisë. KOSTT i ka tri shtylla, ka operatorin e sistemit, operatorin e transmisionit dhe operatorin e tregut. KOSTT në këtë rast, në cilësinë e operatorit të tregut vetëm i përcakton rregullat e palëve që duhen të sillen në treg, por nuk tregton”, tha ai.
Mirëpo, sipas anëtarit të komisionit nga radhët e LVV-së, Armend Muja, në këtë periudhë tri vjeçare sa ka qenë në krye të KOSTT zotëri Ismajli, Kosova ka importuar energji elektrike 118 milionë euro.
Ai tha se 55 milionë euro e importit të energjisë është nga IFT Grup e Vuk Vukamoviq dhe 20 milionë tjera nga Roadnap grup e Qeverisë së Serbisë.
“Në bazë të asaj që ju na keni dërgua dhe anëtarët e komisionit e kanë, thuhet se janë importuar për tri vjet 118 milionë euro energji elektrike nga Kosova. Në mesin e partnerëve kah kemi importuar energji elektrike, nga 118 milionë euro, 55 milionë i kemi importuar nga IFT Grup nga Vuk Vukamoviq, 20 milionë nga Roadnap Grup e Qeverisë së Serbisë, 2 milionë euro nga IPIES dhe 2.6 milionë euro nga GENI-DOO Beograd”, tha ai.
Lidhur me këtë pati një arsyetim ish kryeshefi i KOSTT-it.
“IFT që e dina kush qëndron prapa, e di që ofertat në KEK gjithmonë ka qenë më i volitshmi. Shtrohet pyetja pse ka pas kompani që kanë ofertuar, por gjithmonë IFT ka dal më e lira, sepse ajo i ka keqpërdor hidrocentralet e Bosnjës që janë në pjesën e Republikës serbe, dhe duke qenë hidrocentrale ata munden me ofrua energjinë modulare kurdo që ti e kërkon”, theksoi ai.
Sipas Ismajlit KOSTT-it i është bërë padrejtësi e madhe që të kujdeset për furnizimin në veri.
“Importi i KOSTT-it vjen për shkak të gabimit të madh që i është bërë dhe padrejtësisë ndaj KOSTT-it kur është vendos që të kujdeset për furnizimin në veri. Po ashtu edhe më vonë me hyrjen e rregullës së balancimit, kur KOSTT-i e merr përsipër me bë edhe balancimin”, theksoi ai.
Pas përfundimit të dëshmisë së Ismajlit, komisioni mbylli punimet. /Kosovatimes/
