Asociacioni i Komunave të Kosovës, ka njoftuar se Ministrja e Arsimit, Shkencës, Teknologjisë dhe Inovacionit Arbërie Nagavci i ka kthyer përgjigje kërkesës së Kryetarëve të Komunave lidhur me formën dhe mënyrën e kompensimit të orëve mësimore të humbura gjatë ditëve të grevës së punonjësve arsimor në Republikën e Kosovës.
Sipas saj, mësimi vazhdon të mbahet sipas kalendarit të MASHTI-it të cilin e kanë publikuar ditë më parë, njofton Asociacioni i Komunave të Kosovës përmes një postimi në faqen zyrtare Facebook.
Në përgjigje ndaj kërkesës së AKK-së, Ministrja Nagavci ndër të tjera thotë:
Sa i përket propozimit tuaj që kompensimi i 22 ditëve të humbura të bëhet duke shtuar nga 5 orë Brenda javës për çdo nxënës, ju njoftojmë se praktikisht dhe teknikisht është e pamundur të realizohet një gjë e tillë, si nga aspekti pedagogjik, ashtu edhe ai logjistik. Në këtë mënyrë, do të zgjatej dita e punës në shkolla, gjë që do të shkaktonte çrregullime në shkollat që punojnë në dy ndërrime, si dhe do të shkaktohej një barrë shtesë psikologjike e emocionale për fëmijët”.
Siç dihet, me datën 7 tetor Kryetarët e Komunave i drejtuan një kërkesë Ministres Nagavci lidhur me formën dhe mënyrën e kompensimit të orëve të humbura gjatë grevës. /Kosovatimes/
