Kampioni i Superligës dhe Kupës së Kosovës me Pejën nga sezoni i kaluar, Adriatik Berisha është pritur në një takim lamtumirës nga krerët e FVK-së, presidenti Bahri Gjinovci dhe sekretari i përgjithshëm, Valon Nikqi, të cilët i uruan suksese Berishës në aventurën e re në Tajlandë.
Berisha, i cili karrierën si volejbollist e nisi në Suharekë, ka nënshkruar me kampionin aktual të Superligës së volejbollit në Tajlandë, ekipin Diamond Food Volleyball Club.
25-vjeçari, i lindur në Suharekë, do të jetë pjesë e Diamond Food për sezonin e ardhshëm, derisa do të marrë pjesë edhe në Kampionatin Aziatik të volejbollit, i cili do të mbahet në maj të vitit 2023, në Bahrejn.
Presidenti Gjinovci dhe sekretari Nikqi i uruan suksese Berishës në aventurën e re, derisa e falënderuan për kontributin dhe shtimin e vlerave të volejbollit kosovar ndër vite.
“Dua të falënderoj krerët e FVK-së që më ftuan në takimin e sotëm përshëndetës dhe për mbështetjen e dhënë”, ka thënë Berisha pas takimit.
“Falenderoj familjen time dhe të gjithë ata që më kanë qëndruar afër përgjatë karrierës time deri tani dhe që vazhdojnë të më mbështesin ende në çdo hap.
“Dua të falënderoj veçanërisht ikonën e volejbollit shqiptar, Gazmend Husaj që e bëri të mundur këtë mundësi profesionale për mua.
“Kjo është një mundësi shumë e mirë për avancim në karrierën time profesionale dhe shpresoj ta përfaqësoj denjësisht volejbollin e Kosovës në arenën ndërkombëtare”. /Kosovatimes/
