Qeveria e Rusisë ka urdhëruar kontraktorët që të përfundojnë punimet në Urën e Krimesë – të vetmen që e lidh Rusinë me Gadishullin ukrainas të Krimesë – deri në korrik të vitit 2023.
Moska e ka aneksuar këtë Gadishull më 2014.
Ura është dëmtuar nga një shpërthim më 8 tetor, dhe sipas zyrtarëve, të paktën tre persona kanë vdekur.
Shpërthimi ka shkaktuar dëme në segmentin rrugor dhe atë hekurudhor të urës.
Rusia e ka fajësuar Ukrainën për sulmin, mirëpo Kievi nuk ka thënë se ka qenë mbrapa tij.
Ura 12-kilometërshe, më e gjata në Evropë, ka shërbyer si rrugë kyçe për furnizimin e forcave ruse, pas nisjes së luftë në Ukrainë, mirëpo makineritë e rënda tani nuk mund ta përdorin atë.
Megjithatë, një pjesë e segmentit rrugor është lëshuar për qarkullim për makinat e lehta.
Kjo urë është hapur nga presidenti rus, Vladimir Putin më 2018, katër vjet, pas vendimit të Moskës për aneksim të Krimesë.
Vetë Putin e ka konsideruar sulmin e së shtunës si “akt terrorizmi” nga ana e Ukrainës.
Në Ukrainë është raportuar për festime të mëdha pas sulmit, mirëpo Qeveria në Kiev ka mohuar të ketë qenë e përfshirë në sulm.
Sulmet masive ajrore të Rusisë në disa qytete të Ukrainës, më 10 tetor, janë përshkruar nga Moska si kundërpërgjigje për sulmin në Urën e Krimesë.
Si pasojë e këtyre sulmeve kanë vdekur disa persona.
Megjithatë, analistët perëndimorë kanë thënë se autoritetet ruse janë përgatitur me javë për të kryer këto sulme në qytetet ukrainase.
Lufta në Ukrainë ka nisur më 24 shkurt.
Presidenti rus, Vladimir Putin e quan luftën si “operacion special ushtarak” për të çmilitarizuar Ukrainën.
Perëndimi është përgjigjur ndaj Rusisë, duke goditur ekonominë e këtij shteti me sanksione të ashpra.
Si pasojë e luftës kanë vdekur mijëra persona dhe miliona të tjerë janë zhvendosur nga shtëpitë e tyre.
