Kryeministrja britanike Liz Truss ka thënë se nuk ka ndërmend të largohet ende nga posti i saj, pavarësisht thirrjeve për ta shkarkuar.
Sipas Truss, ajo do të qëndrojë sepse është zgjedhur të punojë për të mirën e vendit dhe këtë synon të bëjë.
Truss tha se ajo pranon përgjegjësinë për “gabimet e bëra” dhe dëshiron të kërkojë falje.
“Unë me të vërtetë dua të marr përgjegjësi dhe të kërkoj falje për gabimet që kam bërë. Doja të ndihmoja njerëzit të përballeshin me faturat e energjisë, me problemin e taksave të larta, por shkuam shumë larg dhe shumë shpejt, e pranova”, shtoi Truss.
Më herët u raportua se tre anëtarë të Dhomës së Komunave nga Partia Konservatore në pushtet – Crispin Blunt, Andrew Bridgen dhe Jamie Wallis – i kërkuan publikisht kryeministres britanike Liz Truss të jepte dorëheqjen. Deklarata u bë në sfondin e turbulencave në tregjet financiare dhe uljes së klasifikimit të konservatorëve pas prezantimit të programit të reformës tatimore të qeverisë.
Më parë, qeveria Truss u përball me kritika për vendimin e saj për të anuluar një rritje të planifikuar të tatimit mbi të ardhurat e korporatave nga 19% në 25%. Pas kësaj, yield-i i obligacioneve pesëvjeçare të qeverisë në Mbretërinë e Bashkuar u rrit në nivelin maksimal prej 4.6%, gjë që çoi në uljen e kërkesës për letrat me vlerë të borxhit të vendit. /Kosovatimes/
