Një shpërthim me lëndë plasëse ka tronditur banorët në orët e para të mëngjesit, në një nga zonat më të frekuentuar të kryeqytetit në ish-Bllok. Në rrugën ‘Sami Frashëri’ afër sheshit Willson, në derën e jashtme të një dyqani kozmetike ‘Divine by Nisa’, që ishte marrë me qira Enisa Pirolli ka shpërthyer një sasi tritoli rreth 50 gramë.
Enisa Pirolli kishte rreth katër muaj që e kishte marrë ambientin me qira për të ushtruar aktivitetin e biznesit, vinte nga Laçi për të punuar. Paraparakisht hetuesit dyshojnë që sasia e tritolit të jetë vendosur për shkak të konkurencës, por nuk përjashtohet mundësia e ndonjë konflikti tjetër. Sasia e tritolit ka qenë rreth 50 gramë, teksa autori është kapur nga kamerat e sigurisë të bizneseve përreth. Ka qenë me një bluzë me kapuç, e ka lënë në pjesën e poshtme të derës, e ka ndezur dhe është larguar.
Për shkak të shpërthimit me tritol, i gjithë pallati ka mbetur pa energji elektrike, pasi janë dëmtuar kabujt përcjellës. Punonjës të OSHEE kanë nisur punën për rikthimin e energjisë. Siç mund të shihet në pamjet që Report Tv sjell, si pasojë e shpërthimit ka dëme të mëdha materiale, ndërsa nuk dihen ende se autorët dhe shkaqet e ngjarjes.
Grupi hetimor po punon për zbardhjen e rrethanave të ngjarjes dhe identifikimin e kapjen e autorit.
