Lidhja Demokratike e Kosovës ka reaguar pas shkarkimit të Naser Sahitit, si rektor në Universitetin e Prishtinës, “Hasan Prishtina”, të cilët kanë thënë se ndërhyrja e pushtetit në UP është akt i papranueshëm.
Sipas LDK-së, shkarkimi i Sahitit ka ardhur si ndikim i partisë në pushtet.
“Nën ndikimin e partisë në pushtet, Këshilli Drejtues i Universiteti të Prishtinës “Hasan Prishtina e shkarkoi sot rektorin i këtij universiteti, Prof. dr. Naser Sahitin”, thuhet në reagimin e tyre.
Tutje ata kanë thënë se Këshilli Drejtues i UP-së ekzekutoi sot sheshazi kërkesën politike të Qeverisë për të instaluar rektor të dëgjueshëm të pushtetit në UP.
“Efektet e ushtrimit të ndikimit dhe të kontrollit nga pushteti në arsimin e lartë dëmtojnë rëndë cilësinë dhe funksionimin institucional. Dija, hulumtimi shkencor dhe studimi në universitet janë jetike për zhvillimin e arsimit, ndaj çdo ndërhyrje politike në këtë institucion të rëndësishëm është i pafalshëm”, thuhet tutje në reagimin e LDK-së. /Kosovatimes/
