Në hapje të edicionit të parë të Forumit për Gratë, Paqen dhe Sigurinë, i cili fillon punimet të shtunën në Prishtinë, një adresim të veçantë do të ketë edhe sekretari amerikan i Shtetit, Antony Blinken. Ky forum është organizuar me iniciativën e Presidentes së Republikës së Kosovës, Vjosa Osmani.
Forumi për Gratë, Paqen dhe Sigurinë me temë “Ndërtimi i Aleancave për Paqe të Qëndrueshme”, organizohet për herë të parë në historinë e re të Kosovës dhe përbën një nga zotimet në kuadër të Samitit për Demokraci, thuhet në njoftimin e Presidencës.
“Fjalimi i Sekretarit Blinken është dëshmi e mbështetjes së vazhdueshme dhe e partneritetit të palëkundur ndërmjet Kosovës dhe ShBA-ve që bazohet mbi vlerat e përbashkëta të demokracisë, paqes dhe prosperitetit”, thuhet në njoftim.
Ndryshe, Forumi në edicionin e parë të tij do të mbledhë 126 folës nga 33 shtete, 6 kontinente dhe mbi 400 pjesëmarrës, të cilët gjatë dy ditëve do të trajtojnë çështje që ndërlidhen më gratë, paqen dhe sigurinë. Në këtë Forum, pritet të marrin pjesë liderë botërorë, ekspertë, akademikë, përfaqësues të shoqërisë civile, të rinj dhe përfaqësues nga grupe të tjera të interesit. /Kosovatimes/
