Lëvizja Evropa Tani, e cila fitoi 21.7 për qind në zgjedhjet e djeshme lokale në Podgoricë, do të ketë mundësinë të formojë një qeveri në kryeqytetin e Malit të Zi dhe kështu ta dërgojë Partinë Demokratike të Socialistëve (DPS) të Milo Gjukanoviqit në opozitë pas 24 vjetësh.
Kjo lëvizje u themelua vetëm katër muaj më parë dhe udhëhiqej nga Jakov Milatoviq, ndoshta kryetari i ardhshëm i Podgoricës dhe ish-ministër në qeverinë e Zdravko Krivokapiqit.
Të dhënat e publikuara nga Qendra për Tranzicion Demokratik (CDT) bazuar në 100 për qind të përpunuara të qendrave të votimit në Podgoricë tregojnë se lista “Të gjithë për qytetin tonë” përbërësi kryesor i së cilës është DPS ka gjithsej 38.1 për qind të votave, pra 24 mandate. Këtë listë në zgjedhje e ka udhëhequr kryetari aktual Ivan Vukoviq.
Në vend të dytë është opsioni më i fortë opozitar – lëvizja Evropa Tani, e udhëhequr nga Jakov Milatoviq, fitoi 21.7 për qind, pra 13 mandate.
Partitë opozitare tashmë kanë bërë të ditur se bashkërisht do ta formojnë qeverinë në Podgoricë, që do të thotë se do të kenë gjithsej 34 mandate, ndërsa DPS 24.
Milatoviq: Qytetarë, gëzuar lirinë!
Duke qenë se Lëvizja Evropa është tashmë opsioni më i fortë opozitar, do të ketë mundësinë të formojë qeveri në kryeqytetin e Malit të Zi, por edhe të propozojë një kryetar komune, i cili do të jetë bartësi i listës, Jakov Milatoviq.
Menjëherë pas shpalljes së rezultateve, ai tha se palët përballen me një sfidë të madhe.
“Gëzuar lirinë qytetarë të Podgoricës. Faleminderit për mbështetjen tuaj të Lëvizjes Evropa Tani. Po fillojmë të punojmë që sa më shpejt të zgjidhim problemet e qytetarëve të Podgoricës, pa DPS. Dhe ta bëjmë Podgoricën një vend më të mirë dhe më të drejtë për të gjithë qytetarët”, tha Milatoviq.
