Në prill, një gazetë ukrainase publikoi imazhe që dyshohet se tregonin dëme të shkaktuara nga trupat ruse në tubacionin e vetëm të ujit të Mykolaiv. BBC ka analizuar imazhet satelitore dhe fotot nga mediat sociale që mbështesin këtë pretendim. Ata tregojnë se tubacioni është dëmtuar në vendin më të rrezikuar – ku del në sipërfaqe nga nëntoka.
Gazetarët i treguan fotografi satelitore dhe imazhe me burim të hapur të tubit ekspertit ushtarak të mjekësisë ligjore Chris Cobb Smith, i cili thotë se nuk ka gjasa që tubacioni të jetë dëmtuar aksidentalisht nga granatimet, sepse nuk ka kratere karakteristike të predhave aty pranë.
Sipas tij, shkatërrimi është shkaktuar nga vendosja e qëllimshme e një mjeti shpërthyes nën ose mbi tub. Një tjetër ekspert britanik i sigurisë Michael Whelan u pajtua me këtë mendim.
Shkatërrimi i burimeve jetike për jetën e popullatës civile shihet si shkelje e ligjit ndërkombëtar humanitar, thonë ekspertët.
Mykolaiv, i cili mbetet nën kontrollin e Ukrainës pas pushtimit rus dhe është afër vijës së frontit, është shpesh nën zjarr. Qëndrimi në radhë për ujë të pijshëm të pastër është jashtëzakonisht i rrezikshëm për banorët e qytetit.
Në javët e fundit, pas hedhjes në erë të urës së Krimesë, të cilën Moska e konsideron një sabotim ukrainas, Rusia ka shtuar sulmet masive ndaj infrastrukturës së energjise dhe ujit në Ukrainë. Më herët komanda ruse deklaroi zyrtarisht se godet vetëm objektivat ushtarake./kosovatimes/
