Kryetarja e Forumit të Gruas në LDK-së, Jehona Lushaku-Sadriu, ka kritikuar Qeverinë e Kosovës për propagandë.
Në profilin e saj në “Facebook”, ajo ka shkruar se pushteti edhe sot po e përdor propagandën për të fshehur dështimet.
Ajo ka vlerësuar se renditja e Kosovës në vendin 57 në raportin “World Justice Project” është dështim.
“Sërish dështim dhe propagandë me numra. Pushteti edhe sot po e përdor armën e tyre të vetme për ta fshehur dështimin: propagandën. Pasi që dështuan në progresin e Kosovës në sundimin e ligjit, në raportin “World Justice Project”, ku për shkak të performancës së dobët të qeverisë, Kosovën nga vendi i 54 në të cilin gjendej në vitin 2020, e sollën në vendin e 60 vitin e kaluar, ndërsa tani vendin e 57 po e propagandojnë si të dytin dhe si sukses! Vendi i 57 është i 57, nuk ka asnjë logjikë të krenoheni me dështime. Tek e fundit raporti është publik dhe mund t’i qaset secili qytetarë. Kjo përveç tjerash është edhe fyerje ndaj qytetarëve”, ka shkruar Lushaku-Sadriu.
