Elon Musk mbylli blerjen prej 44 miliardë dollarësh të Twitter të enjten mbrëma dhe hapi i tij i parë ishte shkarkimi i menaxhmentit të lartë të rrjetit social.
Sipas burimeve të njohura me situatën, Musk shkarkoi CEO të Twitter, Parag Agrawal, Shefin Financiar Ned Segal dhe kreun e çështjeve ligjore dhe politikave Vijay Gade.
Agrawal dhe Segal ishin në selinë e Twitter në San Francisko kur u bë marrëveshja dhe u shoqëruan jashtë ambienteve, shtuan burimet.
Twitter, Musk dhe drejtuesit e shkarkuar nuk iu përgjigjën kërkesës së Reuters për koment.Musk akuzoi liderët e mëparshëm se e mashtruan atë dhe investitorët për numrin e llogarive të rreme në platformë, si dhe nuk i dhanë atij argumente të qarta se si të arrijë ambiciet e larta që ka me rrjetin social me ndikim.
Musk tha se dëshiron të mposhtë “botet e padëshiruara” në Twitter, t’i vërë në dispozicion publikisht algoritmet që përcaktojnë sesi përmbajtja u paraqitet përdoruesve dhe të parandalojë që platforma të bëhet një dhomë urrejtjeje dhe ndarjeje.
Ai nuk ka ofruar detaje se si do t’i arrijë të gjitha këto dhe kush do ta udhëheqë kompaninë. Ai gjithashtu njoftoi pushime nga puna, prandaj rreth 7500 punonjës të Twitter janë të shqetësuar për të ardhmen e tyre, shkruan Reuters.
Më herët të enjten, Elon Musk tha se dëshironte që Twitter të bëhej “platforma më e respektuar e reklamave”, e cila u interpretua si një përpjekje për të fituar besimin e reklamuesve përpara blerjes së pritshme të rrjetit social, ndërsa tha gjithashtu se me këtë blerje që ai donte të “ndihmonte njerëzimin”.
Musk, bashkëthemeluesi i Twitter Jack Dorsey dhe investitorë të tjerë kanë sugjeruar më parë se duan të largojnë rrjetin social nga reklamat dhe të gjenerojnë të ardhura përmes abonimeve dhe mjeteve të tjera. Vetë Musk dikur shkroi “ai urren reklamat”.
“Ka shumë spekulime se pse e bleva Twitter-in dhe çfarë mendoj për reklamat”. Shumica prej tyre e kanë gabim. Në thelb, Twitter dëshiron të jetë platforma më e respektuar e reklamave në botë që fuqizon markën tuaj dhe sjell rritje për kompanitë”, shkroi Musk, njeriu më i pasur në botë dhe CEO i Tesla.
Meqë ra fjala, më shumë se 90 për qind e të ardhurave të Twitter në tremujorin e dytë të këtij viti erdhën nga reklamat.
Musk, një i vetëshpallur “absolutist i fjalës së lirë”, tha në maj se do të hiqte një ndalim në Twitter ndaj ish-presidentit amerikan Donald Trump, i cili u hoq nga rrjeti vitin e kaluar nga frika e nxitjes së dhunës pasi mbështetësit e tij sulmuan Kapitolin.
