Kreu i Lidhjes Demokratike të Kosovës, Lumir Abdixhiku, ka reaguar në lidhje me rastin e trishtë që tronditi qytetarët ku një infermiere sulmoi një të moshuar në shtëpinë e të moshuarve në Pejë.
Abdixhiku shkroi se është i shokuar e tronditur nga dhuna që është ushtruar ndaj gruas. Por edhe më shumë i tronditur nga indiferenca e vëzhgueseve.
“I shokuar e tronditur nga dhuna e ushtruar ndaj një zonje të moshuar. Edhe më shumë nga indiferenca e vëzhgueseve të kësaj dhune”, ka shkruar ai në facebook.
I pari i LDK-së tha se kapërcimi nga një shoqëri që respektonte më të vjetrin, në një që ushtron dhunë ndaj tyre në tallje e përqeshje është përfundim i trishtë
“Ngjarjet si këto nxjerrin anën më të errët të shoqërisë sonë. Ato përveç se të këpusin emocionalisht, të dërmojnë me realitetin e hidhur tek i cili jo rrallëherë po përfundojmë. Kapërcimi nga një shoqëri që respektonte më të vjetrin, në një që ushtron dhunë ndaj tyre në tallje e përqeshje – është përfundim i trishtë. Dhuna është problemi ynë shoqëror; dhe kundër saj duhet dhe do të ngritemi të gjithë”, ka shtuar për fund ai. /Kosovatimes/
