Rasti i sulmit fizik ndaj të moshuarës në Shtëpinë e të moshuarve “Orenda” në Pejë, ka nxitur reagimin edhe të institucioneve.
Në një komunikatë për media, Ministria e Shëndetësisë ka deklaruar se e dënon dhunën e ushtruar ndaj të moshuarës dhe sjelljen jo-njerëzore të infermierëve që ka ndodhur në qendrën e të moshuarve në fjalë.
Sipas njoftimit, sot në shtëpinë “Orenda” kanë shkuar edhe Inspektoriati Shëndetësor për ta inspektuar këtë institucion privat në të cilin jepen edhe shërbime të përkujdesit shëndetësor.
“Të arrestuarat dhe të përfshirët në ngjarje janë të profesionit infermiere, të licencuara nga Oda e Infermierëve, Mamive dhe profesionistëve të tjerë shëndetësorë. Pas inspektimit, Raporti i Inspektoriatit Shëndetësor të Ministrisë së Shëndetësisë do t’i dërgohet Odës, institucion ky i pavarur, me qëllim marrjen e masave konform ligjit, statutit, rregullave dhe kodit etik në fuqi”, thuhet në reagimin e ministrisë.
MSH-ja ka deklaruar se mbesin të përkushtuar për të ruajtur dinjitetin e çdo pacienti dhe të qytetarëve në përgjithësi kur përkujdesi i tyre u besohet profesionistëve shëndetësorë.
Njoftimi i plotë nga ministria:
Ministria e Shëndetësisë e dënon dhunën e ushtruar ndaj të moshuarës dhe sjelljen jo-njerëzore të infermiereve, që ka ndodhur në Shtëpinë e të moshuarve “Orenda” në Pejë.
Inspektoriati Shëndetësor ka qenë sot për inspektim në këtë institucion privat në të cilin jepen dhe shërbime të përkujdesit shëndetësor.
Të arrestuarat dhe të përfshirët në ngjarje janë të profesionit infermiere, të licencuara nga Oda e Infermierëve, Mamive dhe profesionistëve të tjerë shëndetësorë.
Pas inspektimit, Raporti i Inspektoriatit Shëndetësor të Ministrisë së Shëndetësisë do t’i dërgohet Odës, institucion ky i pavarur, me qëllim marrjen e masave konform ligjit, statutit, rregullave dhe kodit etik në fuqi.
Mbesim të përkushtuar për të ruajtur dinjitetin e çdo pacienti dhe të qytetarëve në përgjithësi kur përkujdesi i tyre u besohen profesionistëve shëndetësorë. Çdo abuzim me këtë besim do të ketë reagimin tonë të pa kompromis. Të njëjtën besojmë që do ta kenë dhe Odat e profesionistëve shëndetësorë. /Kosovatimes/
