Joe Biden, presidenti i ShBA-së, ia ka dërguar një letër ish–deputetit të LDK-së, njëherësh anëtar ekzekutiv i bordit LQShA, Faton Bislimi.
Kjo letër vjen si përgjigje ndaj një letre që Bislimi i kishte dërguar presidentit Bidenit më 11 shtator 2022, për të shprehur solidaritetin e tij dhe të shqiptarëve në përgjithësi për përvjetorin e tragjedisë së 11 shtatorit.
Bislimi letrën e ka publikuar në profilin e tij në Facebook, në të cilën thuhet se premtimi i Amerikës është real.
“Premtimi i Amerikës është real dhe veç sa ka filluar…” shkruan Presidenti Biden në letrën e adresuar për mua!
“Në letër i kisha rikujtuar z. Biden se shqiptarët janë populli më pro-amerikan në botë dhe aleati më i sinqertë e i përkushtuar i Amerikës në Evropë. Si Senator dhe Kryetar i Komitetit për Punë të Jashtme të Senatit të SHBA-ve, z. Biden kishte qenë një zë shumë kumbues, argumentues, dhe përkrahës ndaj Kosovës dhe përpjekjes sonë për liri, demokraci e pavarësi”, ka shkruar Bislimi.
Në terën e tij presidenti Biden, ndërkaq thotë se: “Kur isha zgjedhur President, kisha premtuar se do të isha President i të gjithë amerikanëve.” Ndër të tjera, President Biden thekson që “gjithçka është e mundur kur ne bashkohemi si një komb. Asgjë nuk është e paarritshme. Veç na duhet të mos harrojmë se kush jemi”. /Kosovatimes/
