Kirurgët e Qendrës Klinike Universitare të Kosovës kanë reaguar ashpër ndaj presidentes së Kosovës Vjosa Osmani, e cila zgjodhi një institucion privat për të kryer një operacion para Klinikës Kirurgjike në QKUK.
Të njëjtit kanë shprehur indinjatën e tyre për anashkalimin e institucionit publik është thënë në dokumentin e siguruar nga Albanian Post.
“Duke u bazuar në situatën aktuale Kolegjiumi i Kirurgëve të Kosovës reagon ndaj anashkalimit të Presidentes së Republikës së Kosovës znj. Vjosa Osmani, që i ka bërë këtij institucioni duke mos kërkuar trajtim shëndetësor në institucionin tonë, por pa u konsultuar fare me personelin udhëheqës, ka marr trajtim shëndetësor jashtë ShSKUK-së”, thuhet në këtë reagim.
Zyra e Presidentes së Kosovës, ka njoftuar në orët e para të së enjtes, pak pas mesnate, se Vjosa Osmani, ka pasur një ndërhyrje “të lehtë kirurgjike”.
Pas rekomandimit nga mjekët specialistë, Presidentja e Republikës së Kosovës, Vjosa Osmani i është nënshtruar një intervenimi të lehtë kirurgjik (heqja e tëmthit), i cili është realizuar me sukses”, thuhet në njoftim.
Në njoftim sqarohet edhe se “gjatë ditës së djeshme, Presidentja Osmani ka bërë bartjen e përkohshme të përgjegjësive të Presidentes së Republikës tek Kryetari i Kuvendit të Republikës së Kosovës, Glauk Konjufca”.
Nga 3 nëntori, Presidentja do të vazhdojë me ushtrimin e detyrave dhe obligimeve kushtetuese që ndërlidhen me pozitën e Presidentes së Republikës, si dhe gradualisht do t’i kthehet angazhimeve publike.
“Gjatë kësaj periudhe, kërkojmë mirëkuptimin e mediave për të respektuar të drejtën fundamental për privatësi të Presidentes, që është e garantuar me kushtetutë”, thotë në fund komunikata.
Ndryshe nga hera e parë
Ndryshe nga hera e parë Osmani ishte operuar edhe më parë kur kishte ngushtuar lukthin, por atëherë nuk kishte njoftuar fare mediat dhe as nuk kishte deleguar kompetencat.
Operacionin e kishte kryer në Turqi, përkundër se operacionet e ngushtimit të lukthit në Klinikën Kirurgjike Abdominale në QKUK, bëhen suksesshëm dhe shpesh.
Përveç QKUK-së, shërbime të ngjashme ofrojnë edhe në spitalet private të Kosovës.
Ndryshe, akoma nuk dihet asgjë tjetër rreth operimit të atëhershëm të Osmanit, duke përfshirë këtu se edhe sa gjatë qëndroi në trajtim mjekësor atje.
