Kryeministri i vendit, Albin Kurti, ka mbajtur fjalën e plotë në “Prishtina Music Conference” dhe ka thënë se “një lloj organizimi i tillë është i domosdoshëm për muzikën”, duke shtuar se Kosova është në prag të reformës më të madhe ligjore të kulturës
Gjatë hapjes së edicionit të dytë “Prishtina Music Conference”, ka mbajtur fjalën e plotë kryeministri i vendit, Albin Kurti.
Kurti ka thënë se një organizim i tillë është i domosdoshëm për muzikën, si art por edhe si industri.
“Më vjen shumë mirë që kjo iniciativë e juaja, me vlerë të madhe për vendin tonë, i ka mbledhur profesionistët e të gjitha fushave, jo vetëm të vendit tonë, por edhe të vendeve të tjera, të cilët na kanë nderuar me pjesëmarrjen e tyre, por gjithashtu edhe me kontributin në vendin tonë për muzikën mbarë”, thuhet në njoftimin e Zyrës së Kryeminstrisë.
“Përderisa arti është më tepër një lloj rariteti, pra si e bukura, kultura është më shumë e zakonshmja, ajo që përsëritet, ajo që bëhet gjendje, mirëpo historikisht roli i artistit ka qenë që ta bëjë çarjen në mes të kulturës për ta prodhuar të renë”.
Tutje në këtë njoftim thuhej se “dhe artisiti ngjizet edhe lind me një kulturë të caktuar, por edhe një lloj konflikti me atë kulturë prej së cilës lind”.
Sipas kryeministrit, artisti nuk është konformist, e muzika në veçanti është lëvizje.
“Jo vetëm pse na vë në lëvizje por edhe pse përcakton rrymën. Rryma të ndjesisë, të ndjeshmërisë, të përjetimit por madje edhe të mendimit. Sepse muzika nuk është vetëm diçka që e përjeton, por edhe diçka për të cilën duhet të mendohesh. Ajo ecë bashkë me ndryshimet edhe përpjekjet shoqërore, kështu që të gjitha transformimet shoqërore politike, e kanë muzikën e tyre. Ose është një muzikë edhe që i ka bërë ato transformime të tilla çfarë i njohim ne pastaj”.
Sipas Kurti, artisti është edhe në front të ndryshimeve të cilat i duhen shoqërisë e nuk janë vetëm thjesht shprehje e brendshme e tij ose e saj.
“Muzika e Kosovës, ndër të tjera e ka një fuqi të madhe diplomatike. Këtë e ndeshim gjithandej kur takojmë të tjerët, sepse nuk ka njeri që dëgjon sadopak sot muzikë e nuk e njeh Dua Lipën e Rita Orën, Bebe Rexhën e Action Bronson, Ramë Lahajn, Elina Dunin, Ilir Bajrin, Shkelzen Dolin, e mund të vazhdoj me numërim edhe shumë gjatë, por nuk do të qëndrojmë këtu në foltore, sepse të gjithë jemi bashkë për t’i ndjekur ata që pasojnë pas meje në këtë mbrëmje shumë të këndshme”.
Mes tjerash, Kurti ka shtuar se “Qeveria është e angazhuar dhe po përmbush sektorët mungues, duke përfshirë themelimin dhe funksionalizimin e Operës së Kosovës, të cilët sonte janë duke mbajtur koncertin e tyre të radhës, e që së shpejti do t’ua bëjmë edhe shtëpinë e tyre, Teatrin e Operës”.
Kurti ka theksuar se Kosova është në prag të reformës më të madhe ligjore në kulturë.
“Në këtë edicion të dytë të Prishtina Music Conference dua të ju njoftoj se me masat që do të merren me legjislacionin e ri, kultura do të kalojë në një fazë të re zhvillimore. Ajo sigurisht që na prinë, por kur të na prinë duhet ta ndjekim, dhe duke e ndjekur duhet t’i ndihmojmë”, është shprehur kryeministri Kurti.
Kurti ka thënë se Qeveria e Kosovës ka mbështetur ngjarjet më të mëdha të muzikës, si Sunny Hill Festival, festivalet e shumta të ndryshme të muzikës vjetore, Festivalin e Operas Ramë Lahaj International Opera Festival e të tjera. /Kosovatimes/
