Deputeti i Lëvizjes Vetëvendosje, Enver Dugolli, ka thënë se deklaratat e opozitës në Kosovë e inkurajojnë Serbinë dhe grupet kriminale që duan minimin e shtetësisë së vendit.
Sipas tij, në vend të kritikës për Serbinë dhe Listën Serbe, opozita po i kritikojnë veprimet e qeverisë.
“E habitshme dhe shumë e dëmshme për Kosovën kjo qasje e opozitës”, ka shkruar Dugolli.
Kujtojmë se pas daljes se Listës Serbe nga institucionet e Kosovës dhe pas dorëzimit të uniformës së policisë nga serbët e Kosovës, pati reagime nga partitë opozitare, ku kryetari i PDK-së, Memli Krasniqi tha se rreziku i përshkallëzimit në vend është evident dhe i njëjti duhet të shmangët.
Kurse, partia e dytë opozitare, LDK, përmes një komunikate ka thënë se “politikat populiste i sjellin Kosovës dëme afatgjate”.
Ndërsa, kreu i AAK-së, Ramush Haradinaj i ka bërë thirrje kreut të qeverisë, Albin Kurti, që sipas tij, ta ndërpres shkatërrimin e vendit ose do ta ndërpresin ata.
