Ministria e Ekonomisë sot në Parknu për Inovacion dhe Trajnime në Prizren do të inauguroj Rrjetin për Hulumtim dhe Edukim të Kosovës (KREN).
Në inaugurim do të flasin kryeministri i Republikës së Kosovës, Albin Kurti, Ministrja e Ekonomisë, Artane Rizvanolli, Ministrja e Arsimit, Shkencës, Teknologjisë dhe Inovacionit, Arbërie Nagavci, përfaqësuesi i Bankës Botërore për Kosovë dhe një përfitues – përdorues i KREN-it.
Ndryshe me përkrahje nga Banka Botërore, Ministria e Ekonomisë në vitin 2020 ka themeluar Rrjetin për Hulumtime dhe Arsim të Kosovës (KREN). Universitetet në Kosovë tash janë të lidhura me njëri-tjetrin dhe me rrjetin pan-evropian të universiteteve dhe institucioneve hulumtuese GEANT. Mbi 85,000 anëtarë të stafit dhe studentë të universiteteve në Kosovë tash mund të shkëmbejnë njohuritë dhe të bashkëpunojnë në hulumtime.
“Ata kanë qasje edhe në të dhëna dhe burime tjera jashtë Kosovës. KREN ofron shërbime të rrjetit dhe qasje në aplikacione për gati të gjitha universitetet publike dhe private në Kosovë. Ofron platforma për mësim, sisteme për menaxhim të kurseve, dhe softuer të licencuar nga shërbimet e veta në Cloud, të bazuara në serverët më bashkëkohorë. Në të ardhmen kjo infrastrukturë do të mund të shfrytëzohet edhe nga shkollat fillore dhe të mesme, si dhe nga institucionet tjera të shërbimeve publike. Zhvilimi i KREN ishte pjesë e Projektit për Ekonominë Digjitale të Kosovës (KODE), i financuar nga Banka Botërore dhe i zbatuar nga Ministria e Ekonomisë e Kosovës.”, njofton Zyra e Bankës Botërore në Kosovë.
