Ish- kryenegociatorja e Kosovës në dialogun Kosovë – Serbi, Edita Tahiri, ka reaguar pas zhvillimeve të fundit, ku serbët lokalë kanë dalë nga institucionet e vendit.
Përmes një postimi në faqen e saj në Facebook, Tahiri ka thënë se:- “Serbia gjithnjë ka qenë në kërkim të pretekstit për skenarë të ndarjes së veriut nga Kosova”.
Ajo shkruan se sa ishte kryenegociatore, nuk e ka lejuar një gjë të tillë asnjëherë, madje, siç deklaron, Serbisë i ka treguar se “tokat shqiptare shtrihen deri te ‘Molla e Kuqe’”.
“Serbia gjithënjë ka qenë në kërkim të pretekstit për skenarë të ndarjes së veriut nga Kosova, e ka shfaqur indirekt edhe në dialogun e Brukselit. Sa isha kryenegociatore për shtatë vjet, nuk e lejova asnjëherë, madje, kur ishte nevoja, ua tregoja se tokat shqiptare shtrihen deri te ‘Molla e Kuqe’”, deklaron Tahiri.
“Këto tensione që po zhvillohen, kanë për prapavijë ‘veriun’. Nuk është e rastësishme që Vuçiqi sot i bëri thirrje SHBA-ve dhe NATO-s të ndërhyjë në veri për ta qetësuar situatën.”
Ish- kryenegociatorja e Kosovës në dialogun Kosovë – Serbi, Edita Tahiri i ka rekomanduar Qeverisë së Kosovës dhe partive politike, që të jenë në nivelin e përgjegjësisë shtetërore.
“Prandaj, Qeveria e Kosovës, por edhe gjithe spektri politik, pozitë dhe opozitë, duhet të jenë në nivelin e përgjegjësisë shtetërore dhe kombëtare për të mos lejuar skenare që mund të destabilizojnë situatën dhe të çojnë ujë në mullirin e Vuçiqit”, ka shkruar Tahiri në Facebook. /Kosovatimes/
