Në një intervistë për N1 , Dushan Janjiq nga Forumi për Marrëdhënie Etnike në Beograd ka thënë se serbët e Kosovës nuk kanë dalë nga institucionet që të kthehen shpejt dhe se është gabim të pritet një gjë e tillë. Ai po ashtu tha se Brukseli zyrtar e trajton shumë lehtë krizën në Kosovë. Janjiq tha gjithashtu se nuk është i mundur i ashtuquajturi Asociacion i komunave serbe në Kosovë dhe se pala serbe ka gabuar duke e lidhur me Republikën Srpska në Bosnje dhe Hercegovinë.
I pyetur se si e sheh situatën aktuale, në çfarë mund të çojë e gjithë kjo, Janjiq përgjigjet:
“Jemi vërtet në fillimin e një faze krejtësisht të re. Është e qartë se kjo është një tërësi e rëndë rrethanash, të cilat janë rezultat i politikave të gabuara, jo vetëm në rajon dhe jo vetëm te shqiptarët dhe serbët. Tani për tani, shoh një lloj lehtësie me të cilën po merret Brukseli pa menduar për pasojat për vetë EULEX-in, për shembull. Autoritetet e Kosovës do të vazhdojnë të sillen si çdo shtet apo elitë që beson se është e sigurt. Mirëpo, kjo është e pamundur sepse serbët nuk i kanë lënë institucionet që t’u kthehen atyre. Ata dolën për të fituar ndoshta një dialog të ri, një realitet të ri, dhe ky realitet është, ndoshta, një rajon i ri etnikisht i pavarur. Ka shumë të panjohura. Kjo është pjesë e politikës së reciprocitetit. Ajo historia që do të kthehen pas dy-tri netësh më duket krejtësisht joreale”.
Sa i përdor qeveria në Beograd serbët në Kosovë për pikët e tyre politike?
Janë një instrument, që ka ndodhur me kalimin e kohës që nga viti 2013. Serbët në veri të Kosovës nuk janë të integruar. Të gjithë luajtën mbi status quo-në me shpresën se – ose do të largohej Serbia ose do ta zgjidhte dikush tjetër.
Ajo për të cilën insistojnë serbët e Kosovës është formimi i një Asociacioni i komunave serbe. Sa realiste është kjo?
Ai bashkim nuk është i mundur, kjo ishte e qartë që në fillim. Kishte kuptim duke qëndruar vetëm në katër komuna. Ekziston një problem tjetër në atë koncept që pala serbe AKS e lidhi me Republikën Srpska. Kjo lidhje nuk ka ekzistuar kurrë. Ky nuk është një model i mirë, tha Janjiq. /Kosovatimes/
