Shkruan: Florim ZEQA
Kohëve të fundit në shkrimet e mia shpeshherë e kam përdorur thënien “Katër vëllezër, pesë parti”, por asnjëherë nuk i kam dhënë shpjegimin e duhur, jo pse nuk dojna, por prisja që lexuesit ta zbërthejnë kuptimin e kësaj thënie katërçipërore!
Katandisja e partive politike, i ka rrënuar në themel familjet tona
Familja është shtet në miniaturë dhe anasjelltas, shteti është familje e madhe dhe e zgjeruar në shumë dhe përmbajtje. Patriotizmi burimin e ka në familje. Një kryefamiljar i mirë i cili e unifikon familjen e vet, padyshim se do të jetë i aftë të unifikojë edhe fqinjët, lagjen, fshatin, qytetin pse jo edhe shtetin në përgjithësi, në të kundërtën nëse kryefamiljari nuk arrin të krijojë harmoni dhe unitet në familjen e tij nuk ka pse të shkoi me tutje me hipokrizitë e tij!
Një person i cili rrjedhë prej një familje të mirë dhe të moralshme, e ka të hapur derën për të përçuar mesazhe pozitive tek fqinjët dhe tek të tjerët në përgjithësi.
Familja, morali dhe ndërgjegjja e pastër, janë këto tri nga shumë elemente tjera që e bëjnë individin të jetë patriot (atdhetarë) i mirë. Kodet zakonore ishin ligj dhe kushtetutë të cilat e kanë mbrojtur nderin dhe dinjitetin njerëzorë të familjeve shqiptare.
Partitë e sotme politike më shumë ngjajnë në korporata fitimprurëse sesa në parti të mirëfillta politike që kujdesen për rregullimin e rendit shtetërorë dhe shoqërorë në veçanti. Njerëzit e rreshtuar pas liderëve të partive politike, me ardhjen në pushtet brenda natës po bëhen milionerë dhe pronarë të pasurive publike!
Katandisja e vlerave nëpër parti politike i ka rrënuar në themel familjet tona. Për të mos thënë asnjë, të pakët janë sot ata kryefamiljarë (prind) që iu shkon fjala në familjet e tyre, e të mos flasim për vëllezërit e të njëjtëve prind, të cilët janë bërë “pikë e pesë” siç e thotë populli nëpër parti të ndryshme politike, ku nuk dihet kush me kë është dhe cilës parti i përket!
Herë majtas e herë djathtas, herë me “Hatën” e herë me “Fatën”, herë me t’kaltër e herë me t’kuq e kanë bërë Kosovën rrush!
Pak ka rëndësi cila parti fiton e cila humbë, fitues jemi ne
Siq e ceka në titull të shkrimit “Katër vëllezër, pesë parti”, mirëpo, kjo nuk ka të bëjë fare me numra, por me përmbajtje. Edhe në atë familje ku janë vetëm dy vëllezër nuk janë bashkë në të njëjtën parti, e të mos flasim për familje të mëdha ku janë 5,6,7 apo 8 e më shumë vëllezër dhe motra, ku të gjithë janë të degdisur nëpër shumë parti!
Pa dashur që ta personalizojë analizën politike, vërtetë duket e neveritshme dhe qesharake ku i sheh nëpër tubime partiake individët e caktuar duke kërkuar unifikim politik në parti, kurse në familjen e tij janë të ndarë nëpër disa parti!
Vëllezërit e ndarë nëpër disa parti politike, fillimisht duhet të bashkohen në një parti politike, pastaj të ju bëjnë thirrje të tjerëve për unifikim në atë apo këtë subjekt politik!
Problemi është, se vëllezërve të shpërndarë nëpër parti të ndryshme politike nuk ju bën përshtypje përcaktimi ideologjik, pasi mendjen e kanë tek interesi personal dhe familjarë, si të përfitojnë nga cilido që vjen në pushtet.
Pak rëndësi ka cila parti i fiton zgjedhjet, përfituese del familja e “katër” vëllezërve, ndërsa ai që është i vetëm dhe pozicionohet në njërin krahë politik rrezikon të mbetet “Fetah” apo “as me ne dhe as me ata”!
Ky është realiteti i hidhur në Kosovën e sotme, në të cilën nuk vijnë në shprehje vlerat e mirëfillta, por gjuha e muskujve dhe maskarallëkut njerëzorë.
Në shoqërinë e sotme kosovare, njerëz të zotët konsiderohen ata që dinë të gënjejnë dhe mashtrojnë, ata që plaçkitin dhe dhunojnë, ata që vjedhin dhe uzurpojnë, kurse të paaftë konsiderohen të gjithë njerëzit e ndershëm që nuk i bëjnë veprat e sipërpërmendura!
Në një vend ku nuk vlerësohen dija dhe vlerat njerëzore, nuk mund të thuhet që është vend normal për të jetuar në të! Ajo që i dallon njerëzit nga kafshët, është instinkti dhe ndërgjegjja e jo dukja e jashtme!
Historia na mëson se, kështu siç jemi katandisë sot, ishim edhe në të kaluarën përgjatë pushtimeve të gjata. Parullat “Vdekje tradhtarëve liri popullit” dhe “Vdekje fashizmit liri popullit”, etj., na paskan qenë vetëm maskarada mashtruese, ngase gjithmonë me vete i paskemi marrë zuzarët dhe tradhtarët!
