KMLDNj, i informuar nga familjarët, për gjendjen e rëndë shëndetësore të Hysni Gucatit, kryetar i OVL–së së UÇK-së, i dënuar nga Gjykata e Hagës, shprehet i shqetësuar për gjendjen jo të mirë shëndetësore, si dhe për trajtimin joadekuat ndaj tij.
KMLDNj, përmes një shkrese për medie, bën të ditur opinionin se për shkak të kalkulimeve të Gjykatës Speciale , ndërhyrja kirurgjike është bërë me vonesë dhe vetëm pasi ishte dënuar, thuaja, me dënim kapital prej 4.5 vjetëve me burg e që , thuaja, ishte përmbushje e kërkesës së Prokurorit të “Specializuar” që kërkonte dënim maksimal prej 6 vjetëve burg për Hysni Gucatin dhe Nasim Haradinajn.
KMLDNj, gjithashtu, shprehet i shqetësuar edhe për gjendjen shëndetësore edhe të burgosurve të tjerë të Salih Mustafës dhe Jakup Krasniqit, duke kërkuar nga organizatat monitoruese (ndërkombëtare ) që të ngrenë këto shqetësime si shkelje e të drejtave të njeriut të personave të privuar nga liria e që janë të garantuara me të gjitha dokumentet ndërkombëtare për të drejtat e njeriut në kohën kur Gjykata Speciale, me Rregulloren për trajtimin e të drejtave të njeriut të personave të privuar nga liria, përveç Rregullave Evropiane të Burgjeve, ka integruar edhe Rregullat e Nelson Mandeles, si standardi më i lartë i trajtimit që parashihet nga Organizata e Kombeve të Bashkuara.
KMLDNj fton Kuvendin e Kosovës, si themelues i Gjykatës Speciale, përmes Komisionit për të Drejtat e Njeriut, seriozisht të trajtojë këto shqetësime, duke i adresuar edhe në një seancë të Kuvendit, si pikë e rendit të ditës apo si temë e veçantë.
KMDLNj përkujton opinionin se në raste të ngjashme, madje shumë më të rënda në Tribunalin Ndërkombëtar për Krime Lufte për ish – Jugosllavinë, trajtimi shëndetësor ka qenë më human dhe më profesional. /Kosovatimes/
