Ministrja e Punëve të Jashtme, Donika Gërvalla, kërkoi nga Bashkimi Evropian që të mos i tolerojë veprimet kriminale që të veprojnë kundër parimeve evropiane dhe sundimit të ligjit. Këtë deklaratë e ka bërë shefja e diplomacisë kosovare, gjatë një takim me emisarin e Gjermanisë për Ballkanin Perëndimor, Manuel Sarrazin dhe të dërguarin e posaçëm të Sllovenisë për Ballkanin Perëndimor, Anzhej Frangesh.
“Kosova nuk do të tërhiqet nga mbrojtja e qytetarëve të saj në veri nga kërcënimet e ekstremistëve të mbështetur nga Beogradi”, shkroi Gërvalla në Twitter.
Gërvalla postimin e saj e shoqëroi me një fotografi ku tha se “ligji është autoriteti përfundimtar në të gjitha çështjet”.
“Ligji është autoriteti përfundimtar në të gjitha çështjet. Askush nuk mund të shkelë ligjin, sado i pasur apo i fuqishëm të jenë dhe pasojat janë të njëjtat për të gjithë. Askush nuk merr trajtim të veçantë dhe askush nuk trajtohet padrejtësisht. Udhëheqësit nuk mund të përdorin fuqitë e tyre për të thyer ligjin ose për të tradhtuar popullin”, thuhet në postimin e ministres Gërvalla.
