Duke iu kundërpërgjigjur shumë ankesave dhe pyetjeve të qytetarëve lidhur me tarifat e larta të shërbimit që ofron Parkingu i ri nëntokësor tek Fakulteti Fiolologjik, komuna e Prishtinës në kundërpërgjigjen e saj tha se ajo nuk është pronare e plotë e parkingut dhe kompania që e menaxhon vendos çmimet e shërbimit.
Çmimet në këtë parking do të nisin nga 1 euro ora, 15 euro dita, 90 euro java dhe deri 2500 euro.
Parkingu Nëntokësor, është i pari i natyrës së Partneritetit Publiko-Privat (PPP), me teknologji të avancuar dhe standarde të larta urbane. Ky parking, me rreth 600 vendparkingje, synon të reduktojë dukshëm qarkullimin e veturave në qendër të qytetit, përfshirë edhe lirimin e trotuareve për këmbësorë.
Por komuna rikujton se në parkingjet të cilat janë pronë e NP “Prishtina Parking”, rrjedhimisht Komunës së Prishtinës, çmimet për parking janë shumë më të lira.
“Por, në rastin e Parkingut Nëntokësor, kemi të bëjmë me Partneritet Publiko-Privat, ku Komuna nuk është pronare e plotë e parkingut. Si rrjedhojë, përcaktimi i tarifave të parkimit është bërë në bazë të çmimit të tregut dhe duke marrë parasysh investimet e larta të koncesionarit në ofrimin e sigurisë së lartë dhe kushteve shumë më të favorshme krahasuar me parkingjet tjera me këto çmime”, theksoi komuna në reagimin e saj.
Po ashtu, sipas tyre çmimi i vendosur, përfshin edhe kostot e parapara për mirëmbajtjen dhe ofrimin e shërbimit, të cilat janë mjaft të larta.
“Gjithsesi, qëllimi i këtij parkingu është të shërbejë si stacion i përkohshëm parkimi për vizitorët e Zonës 1 – “Qendra”, dhe Komuna e Prishtinës vazhdon të inkurajojë ecjen në këmbë dhe përdorimin e transportit publik për të mirën e ambientit dhe gjithë qytetarëve të Prishtinës”, thekson komuna duke falënderuar për mirëkuptim. /Kosovatimes/
